Vawiin (June ni 11, 2016) chawhma dar 11:30 khan Lawngtlai RD Bock BNRGSK Hall-ah 01 Battalion, NDRF buatsaihin chhiat rupna thlen thulha chet lak dan tur zir hona (Lecture on Disaster Management) neih a ni a. Lawngtlai DC Dr A. Muthamma-in a hmanpui.

DC chuan Mizoram chu mi thiamte’n lirnghing leh leimin hlauhawmna hmun an tih a ni a. A ram leilungin a zir loh avangin mipuite paw’n chhiat rupna lo thlen palh pawhin tih theih nei lo angah inngaiin, pumpelhna awm lo angah kan ngai thin, a ti a. Chu chu thil thlir dan tur dik a ni lo va; chhiat rupna thila chet lak dan tur kan zir nasat a pawimawh zawk a ni tiin, NDRF hma laknaa disaster management chungchang zir hona leh chet lak dan tih chhinna hun buatsaih a ni chu lawmawm a tih thu a sawi.

Vawiin hun hi Lawngtlai SDO (Sadar) Pu Lallawmawma’n a kaihruai a. 01 Bn, National Disaster Response Force (NDRF)-a Inspector Satendra Kumar chuan disaster management awmzia leh a pawimawhna te a sawi fiah. 01 Bn NDRF atang hian team member eng emaw zat lo kalin, anni hian chhiat rupna thlen thulha chet lak dan tur chu a takin an entir nghal a. In chim leh in kang atanga hliam tuar lak chhuah dan te, hliam tuar bawihsawm dan leh hliam tuam dan te, thi chhuak tihreh dan te leh, thawchham leh lungphu tha lova tlute bawihsawm dan te an entir a ni.

He hunah hian DC, DRDA, BDO leh DIPRO office staff eng emaw zat an tel a. Heti ang zir hona hun hi tun kar chhung hian Lawngtlai khawpui chhung hmun hrang hrangah buatsaih tum niin; vawiin chawhnu lam pawh khan SP office-ah buatsaih zui a ni bawk.