Vawiin (June ni 11, 2016) chawhma dar 10:30 khan Lawngtlai DC Conference Hall-ah kawthalo do beihpui thlak (Intensified Diarrhoea Control Fortnight) hawnna leh World Population Day lawmna hun hman a ni a. LADC Chief Executive Member Pu V.L.Hmuaka chu Khuallian niin, Lawngtlai District Bawrhsap Dr A. Muthamma chu Khual Zahawm a ni.

Khuallian Pu V.L.Hmuaka chuan kawthalo do beihpui thlak tura Health Department hma lakna chu lawmawm a tih thu sawiin, kawthalo vanga thihna tihrem chu thil pawimawh tak a ni, a ti a. Kawthalo chu tu pawhin vei thei mah se, naupangin an thihpui ber a; chu vang chuan nu leh pate'n ei leh in leh kawng eng kimah fimkhur taka fate enkawl a tul a ni tiin, kum ruk an tlin thlenga kan enkawl dan hian an dam chhung a hril tih hriat a pawimawh, a ti.

Sawrkar laipui atangin mipui tam dan azir zela sum dawn a nih thin thu sawiin, Khuallian chuan Mizote chu kan la tlem avangin intihtlem aia intihpun kan la mamawh zawk thu a sawi a. Chutih rual chuan fa ngah nu leh pa chuan mahni mawhphurhna hriat chian a, fate chawm zo tur leh tha taka enkawl thei tura thawh a tul a ni, a ti.

Khual zahawm Dr A. Muthamma chuan khawvel pumah kum tin mi tluklehdingawn khat leh a chanvein kawthalo vei a, mi maktaduai khat dawn laiin an thihpui ziah thu sawiin, a tirem tura tan lak a tul hle a ni, a ti a. Naupangin kawthalo a vei fo chuan amahah nghawng tha lo tak neiin, dam chhungin a sawngnawi phah thei a; chumi a thlen loh nan chuan mi tin kan fimkhur theuh a tul a ni tiin, kut sil fai reng leh tui thianghlim chauh in thin a pawimawh thu a sawi a. Chuti ang thil tha chu ching chhuaktu leh puangzartu ni theuh turin kal khawmte a sawm nghal bawk.

Vawiin hun hi Lawngtlai District Chief Medical Officer Dr H.C.Thangkima'n a kaihruai a. District Medical Superintendent Dr Lalchhuankimi'n naupang kawthalo chungchanga hriat tur pawimawhte sawi fiahin, kut sil dan dik a takin a entir a. Dr C.Lalduhsaka'n "Family Planning" chungchang a lem nen sawi a fiah bawk. Hei bakah hian sawi hona leh zawhna leh chhanna hun te hman niin, Senior Medical Officer Dr S.Thaizi chuan lawm thu sawiin, hun a khar a ni.

IDCF 2016-ah hian "Kawthalo vanga naupang thihna tihrem" tih chu thupuiah hman a ni a. World Population Day thupuiah chuan "Mawhphurhna hlen turin ruahmanna siam hmasa rawh" tih hman a ni thung. He hunah hian Medical lama thawktute, health worker, ASHA, anganwadi worker leh NGO hrang hrang ai awh te an tel tha hle.

Kawthalo vanga naupang thihna tirem tur hian National Health Mission (NHM) hnuaiah July ni 11-23, 2016 chhung hian beihpui thlak a ni dawn a. Lawngtlaia beihpui thlak chhung hian primary sikul leh anganwadi centre-ah te kut sil dan a taka entirin, naupangte tan tui thianghlim in tur chhawpsak an ni ang a. Anganwadi centre leh creche centre-ah te kawthalo damdawi (ORS-Zinc) pek chhuahna hmun buatsaihin, he chawlhkar hnih chhung hian TV leh chanchinbu kal tlangin a zau thei ang bera hemi chungchang inzirtirna tha theh darh tum a ni bawk.