Nimin chawhnu khan Chief Minister Pu Lal Thanhawla hovin NEDP Core Committee chu Planning & Programme Implementation Department Conference Hall-ah an thukhawm a. Core Committee Alternate Chairman Agriculture Minister Pu R. Lalzirliana; Member Minister te - Finance Minister Pu Lalsawta leh LAD Minister Pu P.C. Lalthanliana te an tel a. Chief Secretary Pu Lalmalsawma leh Finance Commissioner Pi L.N. Tochhong, Member Secretary Dr. C. Vanlalramsanga bakah Planning & Programme Implementation Department hotulu leh officer dangte an tel bawk a ni.

Chief Minister Pu Lal Thanhawla’n meeting a sawi hawnnaah mipui ten NEDP an dawnsawn dan leh mithiam te hmuh dan sawiin tunhnaia Zokhaw lama kan zinna ah mipuiin NEDP hi an welcome a, feedback pawh kan hmu tha chutih laiin mithiam ten NEDP hi tha an tih thu sawiin Mizo mipui mil zawng tak nia a hriat thu a sawi bawk.

Meeting ah hian NEDP hnuaia Scheme leh Project tam zawk te chu tluang leh phur takin Department hrang hrang ten chak taka an kalpui mek thu tarlan niin NEDP project/scheme te  pawmpuina leh kalpui dan tur ‘Fast Track’ kalpui mek chu tih chak nise tih leh chak zawka kalpui nise an ti a. Project/Scheme 5 ruahman tawh mahse la lo te chu chhipchhiar taka sawiho niin hengte hi a rang lama tan a nih theih nan a changtu Department te chu January chhunga a rang lama hma la turin thu pek nise tih a ni a. Chief Minister’s Rural Housing Scheme atan unit khat zelah beneficiary cost chu kumin atan cheng 50,000 zel rawt chu meeting hian a pawm a. He Scheme hi kumin sawrkar kumah Siaha, Lawngtlai leh Serchhip District ah te tan a ni dawn a, beneficiary 1200 khuh tura ruahman a ni.  

Meeting ah hian MFA in Sairang ah hmun hma an neih cheibawlna atan NEDP kaltlangin sum ruahman nise tih chu pawm  niin helai hmun hi a theih ang anga chei nise an ti a. Scheme/Project thar 6 chhawpchhuah chu ram hmasawnna atan a pawimawh tiin hemi atana sum hmahruai (token allocation) siam nise an ti. NEDP kalpui dan leh umzuina atan Monitoring Template hnuaiah Quarterly Progress Report, Utilization Certificate leh Completion Certificate ruangam chhawpchhuah chu meeting hian pawmin hei hi uluk taka vil thin nise an ti. Nakum Sawrkar kum 2017-18 a NEDP atan sum ruahman zat tur chungchang pawh sawiho niin hemi atan hian a tam thei ang ber dah anih theih nan hma lak nise an ti a. Kuthnathawktute Ni January ni 14 lo awm turah NEDP chungchanga sawihona leh sensitization neih nise tih pawh rawt a ni a. Sawrkar fawng vuantu Minister leh Parliamentary Secretary zawng zawng leh Department hotulu te chu hun remchang hmasa berah kokhawmin NEDP chungchangah inhrilhriatna neih nise tih pawh pawm a ni bawk.

Tarlan tawh thin angin NEDP hian ram hmasawnna atan a hnathawh dan tha zawk kawng kawhhmuhna leh hlawk zawka thawh dan tur ruahmanna te, infrastructure leh assets kan neih mek hlawk zawk a hman leh enkawl dan mumal tak ruahmanna tur te, sawrkar sum dinhmun siam thatna leh dik leh fel zawka hman dan tur ruahmanna te, Mizoram chhunga sumdawnna leh thil tharchhuah hlawk taka kalpui anih theih nana ruahman te, mipui te tana sawrkar rawngbawlna leh hnathawh chak zawk leh daihzai zawka siam tur a ruahmanna te, Mizo mipuiten thiamna tak tak eizawnna tlak an neih theih nana hmalak te, sik leh sa inthlak danglam nasa lutuk atanga chhiatna thleng thei laka invenna leh Sawrkar hnathawh dan leh hnathawk te hlawk leh inrenchem zawka kalpui anih theihnan a ruahmanna siam te hi a huam vek a. Hetiang taka huam zau leh economy a nghawng (impact) nei lian tur anih avang hian NEDP hi Comprehensive Growth Strategy tih a ni. Kumin atan NEDP tan cheng nuai 25000 ruahmnan a ni.