Nimin (10.5.2018) khan Chief Minister Pu Lal Thanhawla hovin NEDP Core Committee chu CMO's Cabinet Meeting Room-ah meeting pawimawh takin neiin an thukhawm a, kum kaltaa NEDP hmalakna te an thlirho a, tun sawrkar kum 2018-19 atana hmalak ruahmanna sawiho a ni.
Chief Minister Pu Lal Thanhawla’n meeting a thuhmaa a sawi naah Planning Department leh Line Department-te thawh that avanga India ram pumah Mizoram GSDP chu a tha ber te zinga a tel thu te, state te 12 zinga a ber a nihna leh Least Malnourished State, ei khawpkham hmulo tlem berna state a nih thu sawiin, Department thawktute chungah lawm thu a sawi a. He dinhmun atanga chak zawka hmasawn zel nan NEDP kaltlangin hmalakna hrang hrangte tha taka kalpui turi member-te chu a sawm a ni. NEDP chu Sawrkar flagship programme a nih angin mipui zawng zawng, a bik takin zokhaw lama cheng te leh mi harsa te tan hmasawnna thlentu a nih a, ram hmasawnna rualkhai zawk leh chak zawk a thlen theih nan a kalpuitu department ten tha taka an kalpui a beisei thu a sawi a. Hlawhtlinna chu a beneficiary-te kutah awm mahse an mahni kaihruaia kawng kawhhmuh turin sawrkar hnathawk leh line department-te an pawimawh thu Chief Minister hian a sawi bawk.
Sawrkar kum kalta 2017-18 a NEDP hnuaia hmalakna te chu meeting chuan thlir hovin ruahmanna siam te chu a kalpui dan a tha an tih an sawi a. Tun sawrkar kum kal mek 2018-19 atana NEDP project hrang hrang, Line Department-te kaltlanga thawh nan Rs.1,000 cr dah ni a. Vawiin meeting chuan Additional Proposal lut ngaihtuahin, engemawzah a pawm a ni.
NEDP Core Committee chuan hmalakna thar pahnih nimin khan a thuphung a pawm a ni bawk a. Pakhat chu Mizoram Business Infrastructure Establishment/ Development Scheme niin, sawrkar emaw mimal ram awl/hman tangkai loh lai awm te chu khawtlang mamawh atan motor parking emaw, eitur leh chawhmeh zawrhna (modern food market) emaw sumdawnna hmun atana hman tangkai a nih theihna tur a ni.
A pahnihna chu "My Project, My NEDP- Mipui Mamawh Intawm Ruahmanna (MiMIR)" niin, hemi hnuaiah hian Mizoram mipui te ngeiin District tina khaw pakhat theuh nasa taka a lo changkan theih nan hmasawnna (developmental) project, mamawh intawm tur, eizawnna siam thei tur lam hawi an duan theih tura ruahmanna a ni a. He project hnuaiah hian Rs. 8 crore dah niin, chu chu District tinah project pakhat atan Rs.1 crore theuh hman tura ruahman a ni. Heng Project-te hi inelna thianghlim leh langtlang hmanga thlan a ni ang a, project hi Local/Village Council-te kaihhruaina hnuaiah veng/khua chhunga tlawmngai pawlte atangin palai 2 theuh te nen Joint Committee siamin an thukhawm thin anga, an sawihona atangin Project Concept Paper an siam ang a. Mimal atangin project hi dawn theih a nilo a, mi thahnemngai ten project an neih chuan Joint Committee hnenah an thlen tur a ni. Project endik tur hian MiMIR Committee district tinah DC kaihruaiin din a ni ang.
NEDP Core Committee meeting-ah hian Finance Minister Pu Lalsawta; School Education Minister Pu H. Rohluna; UD&PA Minister Pu Zodintluanga; LAD Minister Pu P.C. Lalthanliana; H&FW Minister Pu Lal Thanzara; State Planning Board Vice Chairman Pu Liansailova; Chief Secretary Pu Arvind Ray; Pu Lalnunmawia Chuaungo, Principal Secretary Finance; Planning Secretary Dr. C.Vanlalramsanga; Pu Sawihlira, Finance Secretary leh Planning Department officer dangte an tel a ni.
