Vawiin chawhnu khan Chief Minister’s Cabinet Room-ah Chief Minister Pu Lal Thanhawla ho in sawrkar mipawimawh te chuan NEDP hnuaia thingtlang khua a kuthnathawkmi te tih hmasawnna tur, United Nations Development Programme(UNDP) in a duan zirchianna an nei.
He meeting pawimawh takah hian thingtlang khaw kuthnathawktu ten anmahni eitur leh tualchhunga an hralh aia tam buh leh bal an tharchhuah te, sum leh paia awlsam zawka an chantir theihna tura UNDP in ruahmanna a buatsaih chungchang leh kalpui a nih theih dan te sawiho a ni.
Meeting kaihruaitu, Chief Minister Pu Lal Thanhawla chuan kharchhawngtute leh ‘Middle men’ te lak atanga kuthnathawktute chhanchhuah chu thil hmanhmawh thlak a nih thu a sawi a. Kuthnathawktu ten leirem an rah hun leh eizawnna ngelnghet an neih hma chu ram in hmasawnna kawng a zawh tak tak thei lova. Kuthnathawktute thawhchhuah tihpun leh an tharchhuah lo leitu sumdawng te paw’n tam an tih zat, hralh tura lakkhawmsak a nih theih nan concerned department te an tan mar pat a ngai tih a sawi a. Bial khat chhunga kuthnathawktute leh concerned department te pawh in inthlunzawmna tha tak an neih a tul bawk a ni a ti a. Mizoram a thlai thar te chu hriselna atana tha, organic products vek an ni a; Mizoram in a chawk luh te chu hriselna atana him lo, damdawi hmang a enkawl a ni tih te chu mipui in an hriat a ngaih thu sawiin Mizoram in a tharchhuah te ngaihhlut nachang hriat a ngai a ti.
Thusawitu dang, Planning Minister Pu Lalsawta chuan kuthnathawktu ten eizawnna ngelnghet an neih a, an thlai thar te man man zawka an hralh sawrkar in a tum thu a sawi a. Chutih lai chuan kuthnahnawktute thlai thar te awmze neia suma lo chan tir turin entrepreneur te tan erawh, hmun a awm thu leh Mizoram a thlai thar te chu a man tur dik tak, a leitu mipui te tana sum hlohna emaw hekna tur awmlo, a tu te tan pawha hlawk ve ve tura kalpui thiam a pawimawh hle a ni a ti a. Inrinni ringawt a, thlai thar bazarpui hawn hisap lovin kartluana thlai tharhlam zawrchhuah a nih theihnan dawrkai te pawn Air Conditioned Vegetable Stall te hawn a tinzawn a hun tawh a ti.
UNDP in Village Level Development Programme(VLDP) a duan atan a senso zat tur chu Rs. 5.1 Crore a ni a. Concerned Department te leh UNDP thawhhona in a duan lawk ang thlapa VLDP sum hi hman tura duan a ni a. VLDP ah hian convergence uar a nih tur thu te, concerned department te chu inthlungzawm vek tur leh an hmalakna te inhriatpui vek a nih tur thu tarlan a ni a. VLDP hmalakna hnuaia thingtlang khua te chu a bial ang zawng a tuam niin Farm Producers Organizations(FPO) te tangkai tak hman tum an ni.
