Vawiin chawhnu dar 4 khan Assembly Annexe Recess Room A ah Chief Minister Pu Lal Thanhawla hovin NLUP kaihhnawih department enkawltu Ministers, Secretaries leh department hotute an thukhawm a, kuthnathawktu te khaichhuahna tura Sorkar hmalakna pui - NLUP kal  chhoh pui mekah department te hmalak dan leh dinhmun te an thlir ho.

Chief Minister Pu Lal Thanhawla chuan NLUP buaipuitu officials te thawhrimna leh thahnemngaihnaah lawmthu a sawi a, NLUP chu kuthnathawktute chhanchhuahna a nih avangin hlemhletna leh mahni hmasialna a leng lo a ni tih sorkar hruaitu leh hnathawk zawng zawngin hre vek tura a duh thu a sawi. Kan sum dinhmun a that loh avangin kan neih ang ang renchem leh daihzai taka kan hman thiam a pawimawh hle a ni, a ti bawk. Sorkar flagship programme NLUP kalpui mekah department ten beneficiaries te mamawh an phuhru thei em tih te, a hlawhtlin chhoh ngeina turin harsatna tawh mek an nei em tih te leh beneficiaries te thawh that leh that loh te an vil dan te Chief Minister chuan a zawt a, Mizoram hmel thar siam nan NLUP chu hlawhtling taka kalpui a nih theih nan line department hotute chu theihtawp chhuaha tan la chhunzawm zel turin a chah bawk.

Vawiin NLUP meeting ah hian line department ten trade hrang hrang an kalpui mek dan leh tuna an dinhmun te, harsatna awm thei te leh tih dan tha zawk turte ngun takin an sawiho a, meeting ah hian NLUP Nodal Minister Pu H.Liansailova, Rural Development Minister Pu R.Lalzirliana, Industries Minister Pu S.Hiato, Forests Minister Pu H.Rohluna, A.H.& Vety. Minister Pu N.K.Chakma, Parl. Secretary Pu K.S.Thanga, NLUP Implementing Board Chairman Pu R.Selthuama, MLA, Chief Secretary Pu Vanhela Pachuau, IAS te leh Secretaries/Commissioners leh line department hotute an tel a ni.