Vawiin khan Higher and Technical Education Minister Pu Lalsawta chuan Hrangbana College Women's Hostel, Durtlangah a hawng.

Minister chuan Hrangbana College hmeichhe zirlaite tan Hostel awmna tur him leh tha tak an nei thar chu lawmawm a tih thu a sawi a. Hostel chu tluang taka enkawl chho a, mi dangte tan pawha entawntlak tur khawpa tha leh uluk a vawng turin a chah a. Veng neitu Local Council te pawhin neitu chan chang an nih inhria a, a enkawl zuinaah theih tawp chhuahpui turin a sawm a ni. Minister chuan Mizoram chu ram dangte angin khawl ropui siam chhuah kawngah leh ram leilung hausaknaah mite el pha lo mahse zir thiamna kawngah erawh chuan ram dangte aia kan hnufualna bik a awmlo a ti a. Mizote hi zirna hmang hian kan dingchhuak thei a ni, tiin zirlai leh zirtirtu kal khawm te chu thahnemngai taka thawhpuiah a sawm a ni.

He huna thusawitu dang Education Secretary Pi Esther Lalruatkimi pawhin Hrangbana College chu Girls Hostel thar an nei chu lawmpuiawm a tih thu sawiin Mizote hian hma kan sawn theihna turin thil a chhe zawng ngawt a ngaihtuah lova, a tha zawng leh a beiseiawm lam thlira ngaihtuahna kan hman a tul a ni, a ti.

Govt. Hrangbana College Women's Hostel hi University Grants Commission sum Rs 79,99,998 senga sak a ni a. Chawng li (4) niin a dung ft 88, a vang 34 a ni a. Hostel hi hmeichhe zirlai 40 awm theihna tur a ni a, Waiting room, choka, Dining Hall, Warden Quarter, Chowkider Quarter leh Garage lian tha tak bakah tuizem tui litre 50,970 zet dawng a nei bawk. Hostel hi Durtlang a awm niin kum 3 leh ni 16 chhung sak a ni.

Hostel hawnna inkhawm hi Commerce Head of Department Pu Lian V. Khiangte in a kaihruai a, HBC Principal Pu K. Liantuala'n lawmthu sawina hun a hmang a. He college atanga zirchhuak thahnem takin inkhawm hi an chhim a ni. Hawnna inkhawm neih zawh hian Minister Pu Lalsawta, Secretary Pi Esther Lalruatkimi leh Principal hlui Pu R. Zatlaia ten a kawtah thing an phun nghal bawk.

HBC hi 1980 a din a ni a, Academic leh sports lamah pawh NEHU leh MZU hnuaiah a titha ber pawl an ni reng thin a ni.