Vawiin khan NLUP atana thawktu hrang hrang, Implementing agencies ten Aijal Club-ah inhlan tharna- Rededication Programme- an hmang a. Chief Minister Pu Lal Thanhawla, NLUP Apex Board Chairman-in a hmanpui a ni.

Inhlan tharna hun hi NLUP Nodal Minister Pu H.Liansailova’n a kaihruai a. Chief Minister Pu Lal Thanhawla chuan “Tuna kan thlen chinah chauh pawh hian a lawmawm hle tawh a ni” tiin NLUP kalpui mek chu mirethei leh pachhia te, hmeithai leh chhumchhia te dinhmun chawikan na tura Pathian remruat a ni tih a rin ngheh tlat thu a tarlang. Pu Hawla chuan NLUP ruahmanna duangtute leh Mizoram sorkar beisei phak bakin central sorkar hotute rilruah thawktu a awm avangin ruahmanna kimchang zawk leh sum pawh thahnem zawk takin NLUP chu central sorkar-in a lo tihfel sak a. Tunah hian mi 15000 belh chhahna tur pawh a rawn pe leh a. He programme hi kohhran pawl hrang hrang leh non-government organisation dangte pawhin an phurpui a. Tuna a dawng mekte enkawl zuina tura exit protocol buatsaih lo ni leh te hi Pathian remruatna fel tak atanga lo awm thei a ni, tiin Pu Hawla chuan he hun tha hi bawhpelh a nih chuan a lo her chhuak leh tawh kher lo mai thei a ti a. Rinawmna, dikna leh taimakna nen Pathian tih chunga a dawngtute leh thawktu ten tan lak thar zel a pawimawh tih a sawi.

Pu Hawla chuan thingtlang hmun hrang hrang a fanna ah kut hnathawktu te an lawm a, line department ten an vil tha thawkhat hle tih a hriat, a ti a. Tun aia tha zawka kalpui zel turin mipui nen inpawh tlang taka thawh ho a pawimawh a ni, a ti a.NLUP atana thawktu hrang hrangte chu inpekna thar nen thawk chhunzawm zel turin a chah a. NLUP Implementing agencies hrang hrang te hnenah Certificate of Appreciation a hlan a ni.

He programme ah hian Khualzahawm Pu R.Lalzirliana, Home Minister pawhin line department te fuihna thu sawiin thahnem ngai taka mipui tan rawngbawl zel turin a chah a. NLUP Implementing Board Vice Chairman Pu P.L.Thanga’n report pe in Food & Agriculture Organisation nena NLUP thawh hona chungchang a sawi a. FAO New Delhi office chuan NLUP chu an five year plan-ah project ngaih pawimawh berah an dah dawn, a ti a. FAO tirha University of Minnesota mithiam ten Mizoram an rawn tlawh atanga an report chu NLUP kalpui zelna tur atan leh exit protocol atan a pawimawh hle dawn a ni, a ti bawk.

Vawiina ah chuan district hrang hrang Deputy Commissioner te leh NLUP line department ten an hnathawh report an pe a. NLUP kalpui naa harsatna awm te leh a sutkianna tura rawtna te sawiho a ni a. Pu R.Selthuama NIB Chairman in lawmthu sawiin rededication programme hi a khar a ni.