Vawiin khan Chief Minister Pu Lal Thanhawla leh Minister Pu Lal Thanzara hovin Public Works Department-a hotulu leh Engineer rual ten Department hnathawh leh hmalak mekte thlirna ‘Review of Works’ neiin henga harsatna awmte sutkian anin theih nan a ruahmanna siamte chu sawihoin meeting an nei a. Meeting ah hian Principal Secretary to Chief Minister Pu Lalram Thanga; Engineer-in-Chief Pu R. Vanlaltluanga, Chief Engineer pathum leh an thawhpui Superintending Engineer leh Executive Engineer te an an tel a ni.

Meeting ah thuhma sawiin Chief Minister chuan ram hmasawnna ruhrel pawimawh hmasa leh langsar ber, ram hmel siamtu chu inkalpawhna kawng a ni a, kawng siamtu, enkawltu leh mawhphurtu kan nih angin tun aia nasa leh zuala hma kan laka kan thawh a tul a, a vilna lamah tun aia nasa leh zawka tan la turin ka duh che u a, surprise check neih te hi thil tha tak a ni a, mi tihsual va veh emaw an tihsual va chhinchhiah lam (fault finding) nilovin an inthlahdah tur kan veng thei a, hetia kan uar chuan quality lamah tun aia kan that ka beisei a, Supervision leh quality tha lamah hma kan lak chuan mipui beiseina kan tlin ngei ka ring a ni, a ti. A lu ber atanga a thawktu hnuai ber thleng mawhphurhna(responsibility leh accountability) hi kan tuk (fix) a tul a, khawng taka kal dan hi ngaihtuah zel a tul a ni, a ti a. Engineer te chu quality lamah ngaihnathiamna (compromise) siam lo tura hrilhin tun aia zing zawka work site te tlawha hna kal mekte vil turin a chah a. An thiamna leh theihna te chu ram hmasawnna atan hmang zel turah fuihin theihtawp chhuah turin a hrilh bawk a ni.

Minister Pu Lal Thanzara chuan working season hun chhung hian theihtawpa insangmar a tan lak a tul a pawimawh thu sawi langin PWD engineer te chu theihtawpa tan la turin a chah a. Principal Secretary to Chief Minister Pu Lalram Thanga chuan nikum atang khan Chief Minister hovin Department hma lakna te chu Department hotulu te hova thlir tura ruahmanna hi siam anih thu sawiin kumin pawh hian thla tin hei hi tih chhoh leh tum a ni a, vawiin hian Chief Minister chan PWD atangin bul kan tan a ni, a ti.

Vawiin Review Meeting ah hian Chief Engineer (Highways) Pu K. Lalsawmvela; Chief Engineer (Roads) Pu J. Rammawia leh Chief Engineer (Buildings) Pu Lalmuankima Henry te chuan an hna chanpual theuha hna kal meka an thawh chin leh henga an hma bak te sawiin presentation hmangin an tarlan bakah harsatna an tawh mek te an sawilang bawk a ni.

Mizoram ah hian National Highway 11 awm mekin, NH thui zawng belkhawm chu kilometre 1466.12 a ni a. PMGSY ah hian hna kal mek 25 a awm a. Kumin January khan PMGSY hna thar 56 cheng vaibelchhe 553 man hu chu sanction hmuh a ni a. NLCPR hnuaiah hna 4, NEC a hnuaiah 4, NABARD ah hna 6, CRF hnuaia hna 1 leh EI &ISC hnuaiah hna 1 bakah ADB tanpuina hnuaia hna 1 leh World Bank hnuaia Mizoram State Roads Project II te hi thawh mek a ni.