780/2026-2027

Aizawl the 1st June 2026: Vawiin khan Planning & Programme Implementation Conference Hall-ah SNA SPARSH hmangtu Department Administrative Head-te pualin SASCI & SNA SPARSH chungchang Meeting cum Workshop buatsaih a ni a. Chief Minister Pu Lalduhoma, Finance Minister ni bawk chuan a telpui.

Thusawiin Chief Minister chuan, technology thar lo chhuak zelah central fund kan dawn dan leh a hman dan kalphung pawh a lo changkang ve zel a. Hei hi awlsamna min thlentu tur an ni.

SNA SPARSH pawh hi kan sum hnar lian ber kan kalpuina anih angin a hmangtu Department ten chiang taka kan hriat a tul a. Kum liam ta aia kuminah tha zawka kan kalpui theih nan meeting cum workshop pawh hi kan buatsaih a ni.

Nikum khan kan thawhhona a that avangin SASCI Part 9 ah Efficiency in Financial Management incentives Rs. 350 Crore kan dawng a. Kuminah hian SASCI Part tina reform-link incentive awm zawng zawngte dawng thei khawpa tan lak kan duh.

Chutianga kan kal theih nan chuan Mizoram sorkar chuan Administrative Head zawng zawngte chu Charter of Financial Advisers hnuaiah (Financial power) thuneihna pek an ni a. Hei hian Administrative Approval leh Expenditure Sanction pek chhuah kawngah awlsamna min thlen dawn a ni.

Tin, kum hmasa lam atanga kan tawn hriat pawimawh tak chu Mother sanction kan hmuh tawh chuan a hun taka pawisa hman chhuah a, a hun taka kan SNA SPARSH Account kan khar (close) theih a ngai, tih hi a ni a. Administrative head ten a hun taka Utilization Certificates kan peih ngei ngei a ngai tihna a ni a. Lo inpeih thlap zel turin kan chah che u a ni.

SASCI Part 9 kalpui dan tharah Direct Benefit Transfer (DBT) zela scheme tinte kan kalpui a ngai dawn a, State Welfare Scheme pawh a huam vek a; department zawng zawngin DBT mode kan hman vek a ngai tih hria ang u.

Tun SASCI kal mek (2026-27) a Part 4 leh Part 9 ah hian Mizoram tana incentive (thawh that vanga dawn belh theih) hmuh theih Rs. 650 crore a awm a. Kan state tana thatpui dawrh theih thil a nih avangin hmu thei ngei turin kan tang tlang dawn nia, a ti a. Workshop tangkai taka hmang turin a chah a ni.

He workshop hi Institute of Government Accounts & Finance leh Mizoram sorkar Finance Department te tangkawpin an buatsaih a ni a. Pu Vanlaldina Fanai, Commissioner, Finance in a kaihruai a, a hawnna neih zawh hian mithiamten zirtirna an pe zui a ni.