779/2026-2027

Lunglei, 2026 Nikir thla ni 1: Kum tin May ni 31-a hman ṭhin vaihlo leh a kaihhnawih ṭhat lohzia inzirtirna ni, 'World No Tobacco Day' (WNTD) chu National Tobacco Control Programme (NTCP), Lunglei District huaihawtin nimin, May ni 31, 2026 (Pathianni) khan BKHP Chhawmdawlna In, Melte, Serkawn, Lungleiah hman a ni a. Lunglei District Senior Chief Medical Officer (SCMO) Dr Lalrinthangi chu Khuallian a ni.

Khuallian SCMO Dr Lalrinthangi chuan vaihlo zuk leh hmuam chu ruihhlo ti tura kailawn hmasa ber a nih thu sawiin, miin vaihlo a tih tawh chuan thluakah ngawl veina siamin, sim a har thu a sawi a. Taksa leh rilru hrisel nan vaihlo leh a kaihhnawih laka inthiar fihlim turin mipuite a chah.

Lungleia WNTD 2026 puala hun hman hi Deputy CMO Dr Vanlalngheti'n a kaihruai a. Thupui atan "Unmasking the appeal – countering nicotine and tobacco addiction" (Tawktarh îtawm phèna túr – vaihlo ngawl veina do lêt) tih chu hman a ni.

NTCP Lunglei District Consultant Dr Lalnunsiama Renthlei chuan powerpoint presentation hmangin vaihlo zuk leh hmuamin mihring taksaa nghawng ṭha lo a neih theih dan hrang hrang zirtirin, vaihlo túr (nicotine) hna thawh te, e-cigarette (túrtuibúr) zûk ṭhat lohzia leh vaihlo sim dan kawng hrang hrang a sawi a. NTCP Lungleia Social Worker Pu Vanlalruata'n lawm thu sawiin hun a khar.

NTCP Lunglei District hma laknain kum 2025–2026 chhung khan vantlang puipunna hmun leh pisaah mei zu an awm leh awm loh endikin Anti-Tobacco Squad Drive ṭum 75 kalpui a ni a. Zirna in hrang hrangah vaihlo ṭhat lohzia inzirtirna (awareness programme) ṭum 13 buatsaih niin, vaihlo khap leh khuahkhirh  chungchang training ṭum 7 buatsaih a ni bawk a. Zuk leh hmuam nghei duha Civil Hospital Lunglei OPD No. 11-a Tobacco Cessation Clinic pantu mi 523 an awm bawk.