Social Rehabilitation Board chu vawiin khan Chief Minister Pu Zoramthanga hovin CM Conference Hall-ah Board hmalakna tur hrang hrang leh thawh tur hmanhmawh zual bik te sawiin an thukhawm. Board Chairman Social Welfare Minister Dr. K. Beichhua, Vice Chairman Pu K. Liantlinga, Adviser to Chief Minister Pu C. Lalramzauva leh member dangte an tel kim hle a ni.

Chief Minister chuan zu leh drugs in chhungkaw tam tak a tihbuai mek avangin Social Rehabilitation Board chuan hmabak hmanhmawhthlak leh pawimawh tak a neih thu a sawi a. Tun dinhmunah chuan ruihtheihthil a buai te enkawl dam turin Sethawn ah inenkawlna hmunpui siam chu ke penna hmasa ber ni se a ti. Hemi atan hian tlawmngai pawlte, kohhran leh sawrkar department hrang hrangten inlungrual taka an thawh ho a pawimawh tur thu a sawi a. Hemi rual hian mimal leh pawl anga de-addiction cum rehabilitation centre kalpui mekte chu an hmalaknaah theih ang anga sawrkarin a puih tur thu a sawi bawk. Vawiin meeting hian chetlak dan tur ruahmanna siam tura committee hran din a rel a ni.

Social Rehabilitation Board Chairman Dr. K. Beichhua chuan zu leh ruihhlo avanga harsatna tawkte enkawl tura hmalakna kalpui mek hrang hrang report pe in, De-addiction Centre hrang hrangten inang khat veka an zawm tur inkaihhruaina -Standard Operating Procedure (SOP) siam a nih thu te leh heng de-addiction centre te accreditation pek an nih theih nan inkaihhruaina siam mek a nih thu te a sawi. Vice-Chairman Pu K. Liantlinga chuan YMA ten ruihhlo do a nasa taka an lo beih tawhnaah lawmthu sawiin, pawl pakhat emaw department pakhat chauh thawh zawh theih thil a nihloh avangin a hohova beihpui thlak tura Board din a ni chu lawmawm a ti a ni.

Sethawn a centre siam tumah hian ruihhlo ngaite tunlai thiamna hmanga an taksa enkawl dam mai piah lamah counseling te pek an nih a, an chhuahsan hnu pawha an intunnun ve theihna tur thiamthil te zirtir a, an taksa insawizawina tur hmun te leh sum an dehchhuah ve theihna tur thlenga ruahmanna siam ni se tiin vawiin meeting-ah hian rel a ni a. Karleh hian Chief Minister ho in Board member ten a hmunhma enfiah tura rel a ni.

Social Rehabilitation Board-ah hian Social Welfare Department hnuaia directorate pahnih te, Health & Family Welfare Department, Sports and Youth Services Department, Higher and Technical Department, School Education, Police, Excise & Narcotics, CYMA, MKHC te an tel a ni.