Vawiin khan Venglai Lunglei MHIP chuan an din champha phak vawi 40-na an lawm a; bialtu MLA leh Minister ni bawk Pu C. Lalrinsanga chuan khuallian niin a hmanpui a. Pi Julie Lalrinzami, CJM & Senior Civil Judge, Lunglei chu khualzahawm a ni.

Minister Pu C. Lalrinsanga chuan kalkhawmte chu MHIP Jubilee chibai bukin, an din champha vawi 40-na zet lawm thei dinhmuna an awm chu ropui a tih thu a tarlang a. Chhungkua leh khawtlang nun a hmeichhiate pawimawhna sawiin nu te rawngbawlna pawimawh ber chu chhungkua a ni, a ti.  MHIP member kalkhawmte chu MHIP motto “Mite Tanpui” tih chu vawng nung reng tura chahin an hmeichhe pui te mai bakah midang tanpui ngaite tan penchhuak fo turin a chah bawk a ni. Pu C. Lalrinsanga chuan MHIP Jubilee hmang tura kalkhawmte chu zirna ngai pawimawh tura chah bawkin zirnaah rilru siam thara khawtlangah zirna chu dah sang ber turin a sawm a. Mi harsa zual lehkha zir duh leh coaching kal duh te a theih ang tawk a tanpui thin thu sawiin chutiang mi taima leh tumruh pawisa lama harsatna nei te chu inthlahrung lova a hnena an mamawhte thlen turin a chah a ni. Venglai chu khawpui laili leh lun taka awm a nih avangin hemi venga cheng te chu mi entawntlak ni tur leh a tha zawnga midangte kaihruaitu nih tum turin a chah bawk.

He huna khualzahawm Pi Julie Lalrinzami pawhin thu sawiin Lunglei District chhungah ruihhlo avanga tal buai tleirawl leh thalaite an tam takzet thu te, ruihhlo do kawngah khawtlang nu leh pa ten tun aia nasa zawka tan an lak a tul thu te, police leh excise te pawh kan theih ang zawn a kan tanpui ve a tul thu te leh a zuartute man chhuak tura witness-a tan kan ngam a tul thu te a sawi a ni.

Vawiin Venglai Lunglei MHIP Ruby Jubilee lawman hi President Pi Saizampuiin a kaihruai a, Rev K. Zonunsanga’n hunserh a hmang a ni.