Mizoram State Health Mission Meeting vawi 5-na chu vawiin khan Chief Minister Office’s Conference Room-ah Chief Minister Pu Lal Thanhawla hovin an thukhawm. State Health Mission hi National Rural Health Mission (NHRM) leh State Health Care Society inzawmkhawm a ni a, a hrana agenda an neihte sawiho a ni.

Chief Minister chuan India ram economy chu thang nasa tak anih laiin Mizoram bik chu hriselna lamah kan sang lo hle a ni tih Human Development Index-in a tarlan thu a sawi a. Mipui vantlang hriselna tha zawk kan neih theih nan tun ai hian State Health Mission hmang hian kan la tang thei a ni a ti.

Meetinga agenda chhawpchhuah an neihte zingah, NHRM hnuaia central leh state share ratio 85 :15 ah, kum 2012 March thla thlenga Mizoram sorkarin matching share la pek tur a neihzat Rs.19.76 Crore tarlan a ni a. State Matching share hi hmar chhak state te ngaihhnathiam an nih angin 10% ah tih hniam rawtna an sawiho nghal a. NHRM -Planning Process 2012 - 2013 leh a kaihhnawih chungchangte an sawiho bawk. Sub centre leh Para medical staff te nih tur anga hmalak dan tur te, NHRM hnuaia State Programme Management Support Unit Office sawn chungchangte leh State Health Care Society hnuaia rawtna hrang hrang, Insurance Provider tel lova Health Care Scheme kalpui chungchangte, Bajaj Allianz a sum dah lakchhuah chungchangte leh RSBY hnuaia MNREGA job card holders chungchangte sawiho a ni.

Mizoram State Health Care Society bik hnuaiah hian ni 13th Jan 2012 thlenga hriat theih chinah kum 2010 - 2011 chhung khan damlo 8014 hnenah Rs.6,12,49,333.00 pek a ni a. Kum 2011 - 2012 chhung hian damlo 1186 hnenah Rs.41,92,674.00 pek tawh a ni bawk a. Hemi bakah RSBY hnuaiah kum 2011 - 2012 chhungin mi damlo 141 te tan Rs.9,63,500.00 sen tawh a ni bawk.

State Health Mission ah hian Chief Minister chu Chairman niin Health Minister chu Co-Chairman a ni a, Health Secretary chu Convener & Member Secretary a ni. An ni bakah hian Minister 8, Political Party hrang hrang MLA pakhat theuh bakah official atang leh NGO atangte in, an vaiin member 31 an awm a ni.