Disaster Management and Rehabilitation (DM&R) Department buatsaihin vawiin khan 5th India Reserve Battalion hmunpui Sawrtuichhun-ah State Disaster Response Force (SDRF) batch 2-na te tana training hawnna hun hman a ni a. Training hi Disaster Management & Rehabilitation Minister Pu Nihar Kanti Chakma’n a hawng a ni.

Pu Nihar Kanti Chakma chuan Mizoram hi lirnghing na tak thlen mai theihna, Seismic Zone-V ah a awm avangin chhiatna nasa tak thleng thei hmachhawn tura inpuahchah lawk chu Sorkar in a ngai pawimawh hle a ni, a ti a. Tun thlenga Mizoram in chhiatna rapthlak ka la tawng ve lo chu Pathian malsawmna ropui anih thu a sawi a. Minister chuan training tur te chu Mizoram leh mipui tan an training a ni tih hre reng chunga taima tak leh tih takzeta inthunun chunga training turin a fuih a ni.

 
He hunah thusawitu dang DM&R Secretary Pu T.V. Fambawl chuan Mizoram Armed Police Battalion tinah SDRF  hi din anih tur thu leh hemi atana thlanchhuah ten chhiatrup thlen a chanchhuah hna an thawh theih nan hetiang training hi neih zel anih tur thu a sawi a ni. Chhanchhuahna hnathawh nana hmanraw pawimawh te chu Battalion hmunpuia dah anih tur thu a sawi bawk a ni. State Project Officer Pu Dominic Lalhmanghaiha pawhin thu a sawi bawk a ni.


SDRF 2nd Batch ah hian 1st MAP Battallion leh 3rd MAP Battalion atangin mi 25 ve ve thlan an ni a. Training hian kar li chhung awh tur a ni a. Guwahati a National Disaster Response Force (NDRF) atanga  lokal Trainer 8  ten training hi an pe dawn a ni. Kar li chhunga an training turte chu – Collapse Structure Search & Rescue, Medical First Responder, Flood & Rescue, Fire Fighting, Dead Body Management leh Basics of Chemical and Biological Warfare te an ni.


Nikum June thla khan Ist leh 2nd MAP Battalion atangin mi 50 in hetiang training hi hlawhtling takin an lo zo tawh a ni.


Vawiin training hawnna ah hian DM&R Director leh a thawhpuite bakah 1st MAP Battallion leh 3rd MAP Battalion Commandant te an tel a ni.