Mizoram State Wetlands Authority chuan a vawi khatna atan vawiin tlai khan Chief Minister's Conference Hall-ah an Chairperson Chief Minister Pu Lal Thanhawla, Minister of Environment, Forest & Climate Change Department ni bawk hovin an thukhawm.
Chief Minister chuan meeting sawihawnna neiin Mizoramah "wetland" tia sawi tur tam vakin langlo mahse heng hmun te hi Biodiversity hausak berna hmun annih thin avanga an hlut thu leh, humhalh a hman tangkai a pawimawh thu a sawi a. State Wetlands Authority chuan hemi kawnga hmalakna tangkai zawk a kalpui theih a beisei thu a sawi a ni.
State Wetlands Authority hi sawrkar laipuiin state tinah din tura a phut angin January ni 16, 2018 khan din a ni a. Wetlands Authority hian State chhunga Wetlands (tui tling rengna hmun hnawng) awm zawng zawngte chhinchhiah a, heng hmunte hi humhalh chunga tangkai zawka hman dan tur strategy duang a, a kaihhnawih thawktu hrang hrangte pawh awmze nei zawka hmalak a nih theih dan ngaihtuah te a tih turah a tel a ni. Environment, Forests & Climate Change Department chu Nodal Department a ni.
Vawiin meeting-ah hian Wetlands a identify tawh, Tamdil leh Palak Dil a kum hmasa lama E&FCC Department kaltlanga National Plan for Conservation of Aquatic Eco-System hnuaia hma lo lak tawh dan thlirho a ni a. Tamdil Wetland-ah hian kum 2017-18 chhung khan project cheng nuai 51 (90:10 Central to State) thawh a ni a, Kum 2018-19 atan hian cheng nuai 64.34 man proposal siam  a ni. Kum 2017-18 chhung khan Pala Dil ah hian cheng nuai 58.40 man project hna thawh a ni a, Kum 2018-19 chhung atan proposal cheng nuai 78.924 hmanna tur siam a ni bawk.
Meeting chuan Wetlands Authority hnuaia Technical Committee leh Grievance Committee member turte rawtna siam a ni a. Technical Committee hian document pawimawh te zirchiang a, management plan te siamin a tul anga Wetlands Authority thurawn an pe tur a ni a. Grievance Committee hian Wetlands kaihhnawih a mipuia harsatna awm thei hrang hrang chungchang an ngaihtuah ang.
Vawiin State Wetlands Committee-ah hian State Wetlands Authority Vice Chairperson, Chief Secretary Pu Arvind Ray leh member dangte an tel kim hle a ni.

Attachment

  • Loading attachment...