Vawiin khan State Agriculture Management & Extension Training Institute (SAMETI) chuan ni thum awh tur ‘Training on Processing and Preservation Techniques of Major Fruits and Vegetables in Mizoram’ hawnna hun Agriculture Conference Room, Aizawl-ah neih a ni.

Khuallian Agriculture Director (R&E) Dr. H. Saithantluanga chuan mizo thalaite tana luhchilh theih tura agriculture lam kaihhnawihte hi kan siam that a ngai a, hemi kawnga department-in a hmalakna sawiin sustainable cultivation atanga market lam hawia kan kalpui a tul tawh hle a ni, a ti. SAMETI Director Pu RK Nithanga chuan thusawiin training chu Mizorama kan thil tharchhuahte vawn that inzirtirna kawnga hmalakna a nih thu a sawi a. Hlawkna thar chhuak ngei turin a chah a ni.

Training chhung hian Mizoram University, Central Agriculture University, Selesih, MIFCO leh SAMETI atangin mi thiam tak tak in zirtirna an pe a. ATMA, Horticulture Department, MFPTRC Seling a thawkte tan buatsaih a ni.