Vawiin khan Vanapa Hall-ah Vigilance Awareness Week pualin inkhawm buatsaih a ni a. Chief Minister Pu Zoramthanga chu khuallian niin Mizoram Lok Ayukta Chairperson Pu C. Lalsawta chu khualzahawm a ni. He hapta hi Central Vigilance Commission in October ni 28 atanga November ni 2 chhunga rampum huapa hman thin tura ruahmanna a siam anga kum tin hman thin a ni. Kumin Vigilance Awareness Week thupui chu "Integrity - A way of Life/ Dikna - Nunphunga neih" tih chu thlan a ni.

Khuallian Chief Minister chuan Vigilance Awareness Week chu hlemhletna leh eirukna laka kan filhlim theihna tura hmalak tharna tur a nih ang ngeiin kalkhawmte chu dikna um a, thil diklo leh sual laka fihlim theuh turin a sawm a. Corruption leh thil sual dang khawihlo a, midangte tana hnawk lo tura fimkhur a pawimawh thu sawiin, thil diklo tiduhlote awmkhawmnaah chuan nun a zalen hle thin a ni a ti a. Dikna in ro a rel theihna tura sawrkarin theihtawp a chhuah thu sawi bawkin Chief Minister chuan Lokayukta din kawngah pawh Mizoram chu India hmarchhak a hmahruaitute zing ami a nih thu a sawi a. Mipui vantlang thatna turin leh dikna leh rinawmna entawn tlak lantir turin Pu Zoramthanga chuan kalkhawmte sawm that lehin, mihringte chu kan inven fimkhur chuan sualnaah kan lut lo nge nge thin a ni, a ti.

Lok Ayukta Chairperson Pu C. Lalsawta chuan Vigilance Awareness hapta chu Sardar Vallabhai Patel piancham October ni 31 a tla tura ruahman a nih thu a sawi a. Khawvel chanchin han ngaihven chuan ram changkanglo apiangah corruption a tam thin a, ram changkang apiangah corruption dona khawl a tha in, mi an rinawm zawk thin thu a sawi. Lokayukta chungchang sawi bawkin Pu C. Lalsawta chuan thil sual tih chiang taka hriat chungchanga complain thehluh chu hreh tur a nih loh thu leh, The Whistleblowers Protection Act, 2014 kaltlanga hum an nih tur thu te, eirukna leh hlemhletna chhuaichhuah kawnga an puihna avanga lawmthu sawina te pek an nih tur thu a sawi a ni.

Vawin inkhawm, Vigilance Department buatsaih hi Chief Secretary Pu Lalnunmawia Chuaungo, Chief Vigilance Officer ni bawk chuan kaihruaiin, vigilance awareness week chuan thil tisualtute chhui a umzui leh an phu tawk hremna pek lama hmasawn lam chauh nilovin, a tir atanga thil fello leh diklo a awm loh zawk nan mitin an fimkhur thar leh na tura inhrilhrhiatna ni zawk se tiin kalkhawmte a sawm a. Chief Secretary kaihhruai hian vawiin inkhawmh sawrkar hnathawk leh zirlai kalkhawmten rinawmna nunphunga nei tura khua leh tui intiamna thu an sawiho a ni.

Eirukna leh hlemhletna ven nan sawrkar laipuiin Prevention of Corruption Act, 1988 a siam a. Sawrkar hnathawk bikah chuan eirukna laka an fihlim theih nan CCS (Conduct) Rules-in a phuar mek bawk a. Anti-Corruption Bureau (ACB) chu Mizoram sawrkarin dinin, eirukna leh a kaihhnawih chhui nan a lo hmang tawh thin a. ACB hi Director hovin an awm a, post awm zawng zawng Legal Adviser pakhat tiam lovin Home Department atangin deputation a awm an ni. ACB hian eirukna leh a kaihhnawih tam tak hailangin dan angin mi engemaw zat hrem an ni tawh bawk a ni. Mipui chanvo dikna humhalhtu tur atan Mizoram Lokayukta dinna turin sawrkar chuan The Mizoram Lokayukta Act, 2014 a lo siam a. Eirukna chhuitu tur atana a din Lokyukta hi a inrelbawlna leh a hnathawh danah sawrkar thuhnuaia awm a ni lo. Tunah hian Chairman hovin hna an thawk tan tawh a ni.

Lokayukta hi Prevention of Corruption Act, 1988 hnuaiah eirukna chhui tura thuneihna changtu a ni a, sawrkar hnathawkte mai bakah public servant kan tihho zawng zawng, Chief Minister leh Minister-te pawh tiamin sawrkar atanga tanpuina dawng/hlawh la zawng zawng (sawrkarin a appoint leh appoint loh zawng zawng nen) NGO-te, Corporation-te, Society-te, PSU-te, Commission-te, Government Aided Institution-te, LC/VC te, etc. a thawkte chungchanga eirukna a inhnamhnawihte a chhui thei vek a ni. Lokayukta hi a hnathawh kalphungah sawrkar hnuaia awm tur a ni lova. Sawrkar nen an inthlunzawmna turin nodal department atan Vigilance Department chu ruat a ni.