Nimin (29.10.2019) chawhnu khan I&PR Department changtu Minister Pu Lalruatkima chuan  MJA Press Club, Bethel Veng Champhai a tlawh a. Minister hi MJA President Pu C.Lalhnunpuia leh a thawhpuiten lo dawngsawngin  inkawmhona hun an hmang a ni.

Minister chuan Chanchinbumite chu mipui rawngbawltu an nih angin sawrkar hmalakna leh  pawimawh dangte zirtirna kawngah sulsutu an ni, a ti a. Intuaihriam zel tur an nih hriain an tan  Workshop, Seminar leh Press tour te buatsaih thin a ni a, a tul ang zelin hmalak chhunzawm tum ani, a ti bawk.  IPR Minister chuan Journalist Pension Scheme a taka kalpui anih theihna turin proposal siam anih thute, Health Care Scheme leh Welfare Scheme mumal tak neia kalpui tuma hmalak anih thu pawh a sawi bawk. Press Club Land lease siam leh a panna  kawng leh tualzawl chei hna pawh department lam hotute nen a theih anga hmalak zel tum anih thu a sawi bawk.

MJA Champhai District aiawha thusawitu  President Pu C.Lalhnunpuia chuan hun chep tak kara Minister in ngaipawimawh a a tlawh vangin lawmthu a sawi a. Chanchinbu kaltlanga advertisement mumal zawka dawn anih theihna tura hmalak sak tur a ngenin, Sawrkar in Journalist Pension scheme kalpui tura hma a lak vangin MJA member zawng zawngte aiawhin lawmthu a hrilh nghal a ni.

Minister hi Pu R. Lalremsanga, Jt Director L&RS Dept; Pi Ethel Rothangpuii, PD DRDA Champhai, Dr Lallawmkima DIPRO Champhai leh Pu R.Lalthangliana, Deputy. DPC SAMAGRA Aizawl District-ten an tawiawm a ni.

Press Club a tlawh zawh hian Minister Pu Lalruatkima chuan a  department  chan Land  Revenue & Settlement  leh BDO Champhai hmunhma te tlawhin thawktute nen inkawmna hun an hmanga. Mipuite rawngbawltu an nih angin rinawm, taima leh dawhthei taka thawk turin a fuih a. Mamawh an thlente pawh a tul ang zela bawhzui anih tur thu a sawi a ni. Department a tlawhnaah hian Minister hi Pu Alexander V.Chongthu, DC Champhai; Pu R. Lalremsanga, Jt Director L&RS Dept; Pi Ethel Rothangpuii, PD DRDA Champhai; Pu Zoremthara Ralte,SDO Sadar; Pu Lalnunfela Chawngthu, Settlement Officer leh Pu R.Lalthangliana, Deputy DPC SAMAGRA Aizawl District-ten an tawiawm a ni.