Vawiin khan Siamliana Hall, Charkawn Mamit-ah 28th October- 2nd November Vigilance Awareness Week, 2019 chu hman a ni a. He hun hi Dr. Lalrozama, IAS, District Bawrhsap chuan a kaihruai.

Dr. Lalrozama chuan kalkhawmte lawmna thu sawiin Vigilance Week kan hman denchhen hian rinawmna tinung thar leh ila, nasa lehzuala eirukna leh hlemhletna do  a, fihlim turin kalkhawmte a sawm a ni.

Pu R. Lalnunmawia, Dy. SP, ACB, Vigilance Dept atanga lokal chuan thu sawiin eirukna leh hlemhletna do tur leh a lak atanga fihlim chu mitinte mawhphurhna a ni a. Kan eizawnna kawng theuhah harsatna leh mualphona kan tawh loh nan eirukna lakah fihlim tum theuh ila, Prevention of Corruption Act, 1988 dan hnuaiah mahni chan tur nilo eirute chu hrem theih vek kan ni a, a bik takin Sorkar hnathawkte chu CCS (Conduct) Rules-in min phut angin hlemhletna leh eirukna lakah kan fihlim tur a ni a ti. Hei bakah hian Khawtlang hruaitute, Sorkar atanga hnathawhna atana sum dawngte pawhin anihna tur taka an sum dawnte hmang thin tur leh tul bik thila tihdanglam ngai a awm anih pawhin thuneitute hnenah thlen hmasa thin turin a chah a ni.

Pu R. Lalnunmawia hian Anti Corruption Bureau (ACB) hnathawh dan tlangpui leh an hmalak tawh dante a tarlang nghal bawk.

Pu Jacob Lalawmpuia, Addl. DC Mamit chuan kalkhawmte chu eirukna leh hlemhletna laka fihlim tura intiamna (Pledge) a neihpui a. Pu Shashank Jaiswal, IPS, SP Mamit chuan kalkhawmte hnena lawmthu sawina a nei a ni.

He hunah hian Mamit District chhunga Sorkar hnathawk hrang hrang, College Zirlai naupangte, khawtlangtute leh tlawmngai pawl aiawhte bakah thutharthehdarhtute an tel a ni.

Attachment

  • Loading attachment...