Vawiin hian Serchhip DC Conference Hall ah Vigilance Week, 2019 hmanna leh Vigilance Awareness Campaign buatsaih a ni.

He inkhawm hi Pu R. Lalmuankimi, Superintendent, DC Office in kaihruaiin Pu Chuauhnuna, Addl. DC chuan Week hawnna thuchah a sawi a. Sawrkar hnathawkte chu mawlmang taka thawka, mawlmang taka hlawh la ngawt tura rawih kan ni lova, min ruaitu sawrkarin kalphung leh duh dan a zam anga fel taka hnathawk tur kan nih thu a sawi. Ram inrelbawlna fel leh langtlang a awm theih nan te, eirukna awm lohna ram kan nih theih nan te sawrkar hnathawktute hian tih tur kan neih teuh mai a, chutiang dan pawimawh leh kan tihtur te chiang zawka min hrilh turin Aizawl atangin thawktute an rawn kal a, an chungah kan lawmin vawiina kal khawm ten hlawkpui ngei kan tum dawn nia, a ti bawk. Pu Chuauhnuna kaihhruaiin kalkhawm ten Vigilance Week 2019 thutiam an sawi rual a, kumina Week thupui hi “Rinawmna - Nunphunga neih” tih a ni.

He mi hnu hian Pu Zosangliana, Dy. SP, ACB, Vigilance Department chuan Vigilance Department hnathawh dan te, Anti-Corruption Bureau hnathawh dan te, Lokayukta hnathawh dan te, Complain thehluh dan te, Property Return a hun taka thehluh ngei ngei a tul dan te, eirukna awmze tlangpui te a sawifiah a. Sawrkar hnathawkten an dinhmun/nihna hmachhuana lawmman an lo dawn theih chin te, eirukna chi khat ni chung si a sawrkar hnathawkin lawmman/lawmthusawina hming vuaha thilpek a dawn theih dan te sawifiahin, sarkar hnathawh an hlawh leh an thil neih inhen lo te lakah complain a thehluh theih thute pawh a tarlang a ni. Tin, Vigilance Department leh Lokayukta te thawh hona te sawiin tun dinhmunah Mizoram Lokayukta ah complain panga a luh tawh thu te, case te chu Lokayukta hian ACB ah dan ang thlapa chhui zui tura a pek (refer) thu te, case pakhat chu chhui zawh tawh ni a report pawh Lokayukta ah vek thawnlet fel a nih tawh thu te a tarlang a ni. Pu Zosangliana hian Pu Lalremsiama, Inspector, ACB chuan a tawiawm a ni.

Vigilance Week hi kum tin India ramah 28th Oct - 2nd November inkarah Central Vigilance Commission bul tuma neih thin a ni a, India ram Home Minister hmasa ber Sardhar Vallabhai Patel a piancham 30th October denchhena neih thin a ni.

Serchhipa he Week neihnaah hian Pu R. Sathyasundaram, IPS, SP Serchhip bakah Serchhipa head of offices te, sawrkar hnathawkte, tlawmngaipawl te, chanchinbumite leh zirlai naupang te an tel a, Pu Ramfangzauva, Dy.SP in lawmthusawiin hun a khar a ni.