744/2026-2027 

Aizawl the 29th May 2026: Vawiin khan CM Conference Hall-ah Zoram Medical College & Hospital Governing Body te chu an chairman Pu Lalduhoma, Chief Minister hovin an thukhawm. Dr. Vanlalthlana, Education Minister, Pi Lalrinpuii, Health Minister, Pi Baryl Vanneihsangi, bialtu MLA leh member dangte an tel.

Meeting-ah hian Department of Physical Medicine & Rehabilitation, Medical College-a Department awm ngei ngei tura National Medical Commission-in a tihah doctor pakhat chauh a awm mek a. Ani hian clinical leh faculty mawhphurhna a la dun si a. Hei hi a ranglama siam fel ni se, an ti.

Critical Care Block hi CSR atanga sak mek a ni a. Equipments pawh an nei nghal dawn a. He Critical Care block hi a hman theih huna tangkai taka hman dan tur sawiho a ni.

ZMC & H tihchangtlunna tur proposal, MPLAN lama dahluh tawhte thlirhona neih nghal a ni a. Vawiina Governing Body hian heng project-te a ngaihpawimawh hmasak dan indawt (priority list) a siam bawk a ni. Project te hi a ruala thawh nghal vek theih a nih loh thulhah thawh hmasak dan tur indawt hi siam a ni thin.

Kum hnih liam ta chhungin ZMC & H ah hian Cabin thar 30 leh ICU thar 13 te siam a ni tawh a. ICU bik hi chu a hlui han thawm thatte pawh an awm a. Khum (Hospital bed) hman theih loh (non functional) tam tham tak siam that (functional) an ni tawh bawk a. Tunah hian khum 517 neiin Mizorama Hospital lian ber a ni tawh a ni.

October 2024 khan Post Graduate zirna seat 10 hawn thar a ni a, mi pakuain an zir mek a. Tun hnai mai khan MBBS batch pathumnate an zir chhuah fel bawk.