745/2026-2027 

Dated Champhai, 29th May 2026: Union Minister of State for Housing & Urban Affairs, Govt. of India Pu Tokhan Sahu chuan vawiin khan Champhai hmun hrang hrang a tlawh.

Pradhan Mantri Awas Yojana - Urban (PMAY-U) hnuaia Champhai Zote khuaa insak tanpuina dawngtu te insak a hmunah a en a, insak tanpuina sum an dawn hmanga in tha tak tak an din thei chu lawmawm a tih thu a sawi a, in neitute pawhin mahni puala in nei lo te'n in tha tak an neih theihna tura Prime Minister Pu Narendra Modi-a hmalakna ah lawmthu an sawi ve bawk. Zote a tlawh zawh hian Champhai District Hospital a tlawh leh nghal a, District Medical Superintendent Dr. Zatluanga leh Staff dang ten an lo dawngsawng a, Hospital chhung hmun hrang hrang fang a fang kual a, hospital kalphung te hnathawkte hian an hrilhfiah nghal a ni.

Kahrawt Anganwadi pawh tlawhin thawktute leh naupang nu leh pa ten an lo dawngsawng a, Minister hian nitin wadi an kal em tih leh harsatna an neih te a zawt a, Anganwadi thawktute pawhin Anganwadi in an mamawh te an lo thlen ve bawk. Hemi hnu hian Sakti Sada , Champhai Vengthlang ami chu a tlawh leh a, he hmun hi hmeichhia pasal then avanga awmna nei lote awmna a nih bakah hmeichhia hleilenna tuar te enkawlna hmun a ni a, enkawl mek hmeichhiate hian an fate an awmpui ve bawk a ni. Minister Pu Tokhan Sahu-a chuan hna an thawh dan leh Shakti Sadan an kalpui dan tlangpui a zawt a, thawktute hian he hmuna awm te hi harsatna khirh tak tawk hmeichhiate an nih thin thu leh kum 3 chhung an awm theih thu te, thla 3 atanga thla 6 chhung chauh awm te an awm thu an lo hrilh a, tanpuina pawisa fai a hlan bawk.

Union Minister hian Keilungliah khuah a tlawh nghal a, he hmunah hian PHE Department te chuan lo hmuakin Keilungliah khuah a nih theihna tura hmalakna te, hmalakna tur hmachhawp la awm mek te an lo hrilhfiah a ni. Keilungliah Khuah a tlawh hnu hian Circuit House ah let lehin vawiin tlai khan Aizawl panin a let leh a ni.