746/2026-2027 

Dated Khawzawl, the 29^th May, 2026: Vawiin khan Khawzawl Higher Secondary School-ah World No Tobacco Day pualin hun hman a ni a. Khawzawl SP Pu F. Lalbiakzauva chu khuallian a ni a, District Programme Manager Pu Laldinsanga chuan hun a kaihruai.

Vawiin hunah hian khuallian Pu F. Lalbiakzauva chuan zirlaite hnenah zuk leh hmuam hlauhawmzia leh nghawng tha lo a neihte a sawi a. Kumin theme ‘Unmasking the appeal – countering tobacco and nicotine addiction’ hian vaihlo leh a kaihnawih itawm taka lang chu a hlauhawmzia leh na tak tuar chunga thihna a thlen theih hailan tumna a nih thu a sawi a. WHO-in a chhinchhiah danah chuan kum tin zuk leh hmuam avangin mi 8 million thi an awm thu a tarlang a. Zuk leh hmuam hi drugs hman sualna kailawn (gateway to drugs) a nih thu sawiin, zirlaite chu fihlim tlat turin a chah a ni.

Khawzawl SDPO Pu Jeremia Vanlalhmachhuana hnen atangin Anti-Tobacco Squad hmalaknate report ngaihthlak a ni a. Health Supervisor Pi F. Lalrokungi’n lawmthu sawiin hun a khar a ni. 

World No Tobacco Day hi May 31 a ni a, remchan zawkna avangin vawiinah hun hman a ni a, DIPRO Pi Lalchungnungi Lakher leh Circle Officer Pu Lalrinsiama te an tel a ni.