Vawiin chawhnu dar 2:00 khan Chief Minister Pu Lal Thanhawla chuan 132 kV Central Sub Station Melriat chu a hawng.

Chief Minister Pu Lal Thanhawla chuan ram thangzel leh khawvel changkang chho mekah kawlphetha pawimawh dante sawiin a tel lovin hmasawnna a awm thei lova, hmasawnna hna thawh nan kan kawlphetha mamawh a sang zel a, kan mamawh ngaihtuahin kan siamchhuah a la tlem si a, a siamchhuah lamah hian tan lak a ngai hle a ni, a ti a.  Kawlphetha kan lei leh siam te daihzai leh renchem taka hmang turin Sub Station thar bun a tul thu leh a awmsa te thuamthata tihchangtlun chu Sawrkarin a ngaihpawimawh thu te sawiin hemi lamah hian tan lak mek a nih tih a sawi.

Mizoram khaw tam zawkin eng an neih tawh thusawiin kawlphetha in a la thlunzawm loh khaw tlem te tih en hi Sawrkar ngaihpawimawh berte zinga ami a ni, a ti. Kawlphetha lakluhna leh a semchhuahnaah hloh (Transmission & Distribution Loss) chu Mizorama a san thu sawiin Department pawhin an ven hneh lo chu eng ruk hi a ni a, hei hian Sawrkar tan sumpai lamah hlohna a thlen bakah midang tan harsatna thlen a, T&D Loss tih tlem nan theitawp chhuak mek  a ni, a ti.

Tui leh eng renchem chu thil tul anih thu sawiin chhungkaw tinin hei hi kan ngaihpawimawh a kan inzirtir a tul a, kawlphethaa intodelh state te kan nih loh vangin hei hi thil tangkai tak a ni a, kan neih ang ang te renchem taka kan hman chuan kan mamawh te hi a sem daihzai theih anga, hei hi mitin kan tangkaipui thei dawn a ni, a ti.

Kawlphetha siamchhuahna atana lui khuap te hi Sawrkar ngaihpawimawh anih thusawiin a zawng a za khuap chu a tha lova, mithiam te rawn chungin hma lakna kalpui mek a ni, a ti a. Lui khuapa kawlphetha siamchhuahna kawngah potential nei tha mah ila, nizung hmanga kawlphetha siamchhuah chu Sawrkarin a ngaipawimawh a, Solar Policy tha tak duan mek a ni a, hun reilo te ah he policy hi hman tura chhawpchhuah a ni dawn a ni, a ti. Turial Hydel Project chu NEEPCO in nakum April a peihfel an tiam thusawiin hun hmasa lamah he project hi tih thuanawp leh tihchhiat anih vangin tunah chuan man to zawkin kawlphetha an siamchhuah hi kan lei a ngai dawn a, chu mai bakah kawlphetha siamchhuah zawng zawng kan ta ni tur chu tunah chuan tlem te chauh kan chang dawn a, hei hi kuttling lova sum lak pawisa lo ten harsatna an siam vang a ni a, a pawi hle a ni, a ti. Kut tling lova sum lak tumte hian he hnam hi an ti hnufual leh hnufum ang tih a hlauhawm a ni, a ti bawk.

Sawrkar hnathawk te chu sawrkar chhiahhlawh leh politician sawrkar fawng vuantute chu mipui chhiahhlawh an nih thusawiin kan in duh a thiang lova, mipui kan dah hnuai a thiang lo a, kan hnathawhna theuha mipui dawr nuam, hnathawk tha leh rinawm leh langtlang taka kan thawh a pawimawh a, hetia mipui tana kan tan hova kan thawh tlan chuan kan hlim tlan ka ring tlat a ni, a ti.  

Programme hmanpuitu dang Parliamentary Secretary leh Aizawl South III bialtu MLA ni bawk Pu K.S. Thanga chuan  a bial in Sawrkar ruahmanna hrang hrang zar a zo mek chu lawmawm a tih thusawiin Sawrkar ngaihsakna leh duhsaknaah bial mipui aiawhin lawmthu a sawi a. He hna a line zawmna lamah a tirah compensation avangin harsatna a thlen thusawiin mahni tanghma haia hmasawnna hna tih thuanawp hi a vanduaithlak a, dik lo taka compensation beisei avanga ram neih thin te hi ram hmasawnna daltu an ni a, ram hmelhma an ni bawk a ni, a ti. Power & Electricity Department hma lakna thenkhat sawiin Sawrkar hma lakna te hi chhuanawm nia a hriat thu a sawi bawk.

Melriat Sub Station hawnna inkhawm hi Power & Electricity Secretary, Pu C. Lalhmachhuana, ITS kaihruaiin Chief Engineer (SO) Er. F. Rualzakhuma hnen atangin Technical Report ngaihthlak a ni a, Superintending Engineer, APC Er. C. Lianlunga’n lawmthu sawiin hun a khar a ni.

Central Sub Station Melriat hi NEC sum hmanga 90:10 funding pattern a Departmental Works anga sak a ni a, A hna tanna hi August 2006 niin March 2012 khan physical completion zawhfel niin kumin September khan a technical commissioning hi peihfel a ni a, he hna tan hian cheng nuai 1341.44 ruahman a ni a. He hna rual hian a thlun zawmtu leh a chawmtu tur 132KV line,  ‘Construction of 132kv S/C Transmission line from Luangmual S/S to Melriat (17.06 km) & 132 KV bay at Luangmual’ amah ang bawka pawimawh pawh hi NEC Scheme atang bawka thawh a ni a, Right of Way problem avangin hrui thlun kawngah harsatna lian tak tawh a ni a, compensation leh chhan dang avangin Estimate siam that a ni a, tunah hian zawh fel a lo ni ta a ni. He hna hi cheng nuai 838.37 senga zawh a ni.

He Power Sub-Station hi hman theih (commissioned) a lo nih takah chuan hetiang hian hlawkna  hmuh beisei a ni :

i)     Load sem chung changa harsatna tawh lian tak tak, 132KV Sub-Stations Zuangtui leh Luangmual a mi te hi nasa takin a chhawk zangkhai thei dawn a, tun dinhmunah pawh hian 33kV Sub-Stations Tlangnuam leh Aibawk in a chawm khua leh vengte chu he Sub-Station kal tlang hian chawm an ni tawh a ni.

ii)    Tuna hrui thlun zawh tep tawh, 132kV line Melriat sub station to Lunglei hi a taka hman theih a lo ni tawh ang a, chu chuan Mizoram chhim lam zawng zawng, Serchhip (Bukpui) atanga pek thin lam line a chhiat chang leh Maintenance shut down lak a nih chang pawhin, helam atang hian Power pek theih thin a ni tawh ang.

iii)   Tuna a hrui thlun zawh tep tawh - 33kV line, he Melriat Sub-Station atanga chhuak hian 33kV Sub-Station Mualpui, Salem Veng leh Tlangnuam sub station te a chawmin he Melriat sub station atang hian pek an nih tawh dawn a, hei hian tuna Aizawl khawpuiin transformation capacity-a harsatna a tawh thinte nasa takin a chhawk zangkhai tawh dawn a ni.

iv)   He Sub-Station-in load a lo lak then takah chuan Luangmual Sub-Station atanga PHED Tui pump khawl lian te, ISPAT, Lengte te pawhin an duh ang zat zat, an duh hun hunah power an draw (la) thei tawh dawn bawk a ni.