Parliamentary Secretary (Finance, Planning) Pu KS Thanga chuan nimin (13.12.16) khan Aibawk Water Supply Scheme, Water Treatment Plant, Phulpui-Tuirivang hnar a sak chu a tlawh.

Parliamentary Secretary hian hmalak tawh na te a lungawi thlak a tih thu sawiin, mipuiin private connection la uar deuh deuh turin leh tui bill Sorkarin tlawm tete a charge ve te chu nâ ti lo turin a fuih a, thil engkim a thlawn a dawn reng tumna rilru chu paihbo hret hret tul a tih thu a sawi bawk.

Aibawk Water Supply Scheme, Water Treatment Plant hi ni khatah tui litre nuai 5 leh sing 5 pe chhuak thei tura ruahman a ni a, tunah hian civil work leh electro-mechanical work zawng zawng zawh fel tawh niin, scheme hi March 2016 khan commission tawh a ni a, tunah hian Aibawk bikah house connection 70 chuang pek tawh niin tui pump chhuah hi sem mek a ni.

Phulpui leh Sateek ah pawh hmalak chhoh mek zel niin house connection pawh pekchhuah leh mai theih tur a peihfel thawkhat a ni. Aibawk WSS hi September 2013 khan NLCPR atanga sum approve cheng nuai 979.41 atanga cheng nuai 783.54 an pekchhuah hmanga thawh a ni a. NLCPR atangin final installment cheng nuai 176.29 release leh tawh niin Expenditure Sanction nghah mek a ni.

Water Treatment Plant tlawhna ah hian Parliamentary Secretary hi Pu Lalnunzira, SE; Pu Lalsanga, EE; Pu Lalpektluanga, SDO, Rural WATSAN Circle Aizawl, PHE Department ten an tawiawm a.

Department Official-te bakah hian Aibawk Water Supply Scheme in a chawm tur khua, Aibawk, Sateek leh Phulpui VC member ten an tawiawm bawk.