3431/2024-2025

Dated Aizawl, the 9th December, 2024: Vawiin khan 1st Bn. MAP ground, Armed vengah Chief Minister Pu Lalduhoma chuan 22nd Mizoram Police Sports Meet a hawng. Home Minister Pu K. Sapdanga chu khualzahawm a ni.

Parade contigent 14 te chibai bukna a chhanlet zawhah thusawiin Chief Minister chuan, police hna chu taksa leh rilru hrisel nei te thawh chi hna a nih avangin police ni turin physical test leh exam paltlang a ngai a. Luh hnuah training hautak tawk tak neihpui leh an ni. Service hnuah pawh ngaihpawimawh zui zel niin vawiina kan hawn sports meet pawh hian chu chu a tum a ni. Infiamna lamah kan police te hian Mizoram intihmingtha thin a, tun hnai lawkah pawh C. Lalruatkima, 1st Bn. MAP chuan Asian Open Police Taekwondo Championship ah Gold medal a la a. Ka social media platforms ah te ka lawmpuina ka ziak nghe nghe. Kan sawrkarin kan ngaihsak che u tih hi a takin kan lantir a, in transfer TA leh hamthatna dang, hun rei tak lo tang tawh te kan release nasa a, rifle allowance pawh kan tipung a ni. In indaihlohna pawh kan hriaa, hna ruak engemawzat hnawhkhat turin hma kan la mek bawk.

Ram changkangah chuan mipuiten police an zahin an ngaisang thin a, naupangte pawhin police nih te, fire fighter nih te an chak thin. An police te entawntlaka an nun vang te, khawtlang tana hna tha an thawh tlat vang te a ni. Mizoram police te pawh hi entawn tlak ni tlat ang u. Nunphung dik lo vanga natnain min tibuai nasa lutuk ni tein a lang a. Kan insiam that a ngai hle. Kumin August thla atanga 45 minutes for all ranks of Mizoram Police programme, kan Home Minister Pu K. Sapdanga ruahmannaa in kalpui kha unit zawng zawngten tha takin lo zawm rawh u, tiin a chah.

Sports meet chuan in inkarah inunauna leh thawhhona tha siam se, taksa leh rilru hrisel tak nei tura min kaihruaitu ni ngei se a duhawm. Intihsiak a nih tawh hi chuan chak lo zawk kan awm te a ngai a. Chak zawk nih tuma kan inbuatsaih mek laiin chak lo zawk pawh kan ni thei tih hi kan hre tel dawn nia. Chu ringawt pawh chu infiamna atanga zirlai pawimawh a ni, tia duhsakna hlanin he sports meet hi a hawng a ni.

Pu Anil Shukla, DGP leh Patron 22nd Mizoram Police Sports Meet chuan kalkhawmte lawmna thu a sawi a. Infiamna kawnga Mizoram Police te hmasawnna langsar te a tarlang bawk.

He sports meet-ah hian police te chu pawl (contingent) 12 ah inthenin infiammi 1200 zetin sports discipline 18 ah inelna an nei dawn a. Ni 13 khian a kharna an buatsaih leh ang. Kum 1987 atang khan harsatna a awm loh chuan kumtin Sports Meet hi an buatsaih thin a ni.