3432/2024-2025

Dated Aizawl, the 9th December 2024: Vawiin chawhma dar 11:00  khan Food, Civil Supplies & Consumer Affairs Minister Pu B. Lalchhanzova chuan Directorate of Hospital and Medical Education Auditorium, MINECO Khatla-ah TB campaign runpui - 100 Days Campaign kalpuina tur chu Khuallian niin a hawng.

Hawnnaah hian khuallian Minister Pu B. Lalchhanzova chuan thu sawiin, 100 days campaign a hlawhtlin theihna tur chuan Sawrkar department-te bakah kohhran, tlawmngai pawl leh khawtlangte nena tanrual a pawimawh tak zet thu a sawi a. Sawrkar hmalakna apiangah mipuite chu dahpawimawh ber tur an nih thu sawiin, district thlan chhuah bika TB dona atana hmalaknate chu mipuite'n a tangkai thei ang berin hmang se a duh thu a tarlang a. Mizoram chu ram ralmuang tak ni mah se, hriselna kawngah erawh kan him loh thu leh ralmuang taka awm mai mai thei kan nih loh thu a sawi bawk a. TB dona atan mipuite chu rawn pen chhuaka, sawrkar hmalaknaahte inpekna tak tak nena thawhhopui turin a sawm nghal bawk a ni.

Hawnna programme hi Pi Sangchhin Chinzah, Secretary, H&FW Department chuan kaihruaiin kalkhawmte lawmna thu a sawi a. Kum 2025 a India ram atanga TB umbo tura Ministry of H&FW hmalaknate a sawi zau nghal bawk a. TB damlo chhawmdawlna pe tha zualte hnena chawimawina certificate hlannain chhunzawmin, Dr. Vanlalsawma, Principal Director, H&FW Department chuan certificate hi TB natna vei mi 150 chhawmdawl mektu North Eastern Development Finance Corporation Ltd. (NEDFi), Pu B. Lalchhanzova, Minister, FCS&CA leh Pi Sangchhin Chinzah, Secretary, H&FW te hnenah a hlan a. Hemi zawh hian kalkhawmte'n TB umbo tura intiamna an sawi rual a. Dr. Eric Zomawia, Mission Director, National Health Mission chuan lawmthu sawiin hun hi a khar a ni.

He huna TB programme performance tarlan danin kumin January atanga December ni 9 thleng hian TB rinhlelh mi 24,017 test tawh zingah, TB vei mi 2,164 hmuhchhuah niin, TB vei inenkawl lai mi 147 an thi a. TB vei tihdam leh zat chu 80% a ni.

100 Days Campaign hawnna hun hi State level bakah, Aizawl, Champhai, Mamit leh Serchhip District-ahte pawh neih vek tura ruahmanna siam a ni.