3433/2024-2025

Siaha the 9th December, 2024: Vawiin chawhma Dar 11 khan DC Mini Conference Hall, Siaha-ah Krismas leh Kumthar vuakveta dan leh thupek kenkawh dan tur leh halpuah, halmawi leh puakthei dang khapna thupek kenkawh dan thlirhoin review meeting neih a ni a, he hun hi Pu VL Hruaizela Khiangte, District Bawrhsap kaihhruaina hnuaiah neih a ni.

Meeting kaihruaitu Pu VL Hruaizela Khiangte chuan vawiin thutkhawm chu Krismas leh kumthar vuatvetah District chhunga mipuiin hlim leh lawm taka hun an hman theih nan puak thei thil Halpuah, Halmawi leh adangte khapna kenkawh tura thupek chhuah tawh thlirletna a nih thu a tarlang a, mipui pawhin thupek an chhuah tawhte an ngai pawimawh thawkhat hle nia a hriat thu sawiin theihtawp chhuah chhunzawm zel turin a chah. NGO te chu thawhho puiah sawmin sawrkar kut leh ke an ni a, puihbawmtu ni chhunzawm zel turin a sawm bawk a ni.

Siaha District SP Pu Manny Bhushan Singh, IPS pawhin thusawiin kumin Krismas leh kumthar vuakvetah boruak muanawm tak a awm theih nana an in puahchahnate a tarlang a. Kumin December ni 9-14 inkarah Traffic dan zawmlotu te tan ngaihnathiamna awm lohna (no tolerance drive) buatsaih a nih mek thu te, halpuah leh halmawi hal phallohna thupek (prohibitory order) chhuah a nih tawh thu te a tarlang a ni.

Vawiin review meeting chuan kumin Krismas leh kumthar vuakvetah dan nasa zawka kenkawh nise a ti a, chutih rualin buaina awmlohna hmunah chuan tawngpawng khirh lovin, mipui nawlpui tana harsatna liantham thlen lo zawnga dan kenkawh ni se a ti bawk. Halpuah leh puak thei dang phallohna thupek a tharin chhuah leh nise a ti a. Chu thupek chu kohhran tina chhiarchhuah atan thawn chhuah nise a ti bawk a ni.

Vawiin thutkhawmah hian District Bawrhsap bakah Siaha District SP Pu Manny Bhushan Singh IPS te, Addl DC Pu Abraham Beirazi Khithie, BDO/DTO Pu Manesia Khaimeichho, MADC Sr LAO PI S Lalmuanpuii te bakah official dangte leh NGO hruaitute an tel a ni.