156/2025-2026
Aizawl the 12th April 2025: Vawiin khan Vanapa Hall ah Bru Student Association (BSA), General Headquarters, Aizawl bultumin Bru kum thar Kut, Boisu hman a ni a. Chief Minister Pu Lalduhoma chuan khuallian niin a hmanpui.
Thu a sawinaah khuallian chuan, Bru Students Association hruaituten min hmuh apianga an sawi thin, hun rei tak atanga in lo beisei tawh Bru House cum Hostel hi Tanhril-ah kan sa dawn a. Sum pawh a awm tawh a ni. Reiloteah hna tan thuai kan tum, tiin an tana a kaihhruai sawrkar ruahmanna a puang a. An kut hmanpui tura an sawm avanga lawmthu sawiin, hlim taka kut hmang turin duhsakna a hlan.
Chief Minister chuan, Mizoramah hnam peng hrang hrang kan cheng ho va, inngeih takin kan khawsa thin. Hetianga lungrual taka kan khawsa ho thin hian kan ram a timawi a, a tinuam a. Kum tam tak chhung chu India rama state ralmuang berah kan inchhal tawh a ni.
India ramah mahni hnamzia leh tih dan thate chawi nung turin zalenna kan nei a. Mahni hnam zia leh kalphung chawi lar duh luat vanga hnam dangte tih dan va ngai theih loh erawh chu thil dik a ni thei lo. Tin, hnam hlawm lian deuh te, hlawm te deuh te kan nih avangin awm dan chin tawk kan thiam tlan pawh a ngai. A lian zawk nih vanga a te zawk hnualsuat lutuk te, a te zawk nih vanga pangchan leh lutuk te hi a tha lo ve ve a ni. Midang ngai theih lohna lam chi reng reng hi a tha lo va. Hnam anga inhnuaichhiahna te, sakhua ang zawnga inbeihna te a awm thiang lo. Ralthuam leka inlakna hran tumna lam phei chu a awm kan remti lo bur. Mizoramin chak taka hma a sawn chhan hi remna leh muanna kan neih tlat vang a ni. Hei hi tihchhiat kan phal lo.
Tin, Mizoram mi kan nih chuan Mizoram thatna tur hi kan ngaihtuah ve reng thin tur a ni. Mi tih tur thil tha sawi hi a harsa lutuk lo va, midang thawh chhuah sa han sawiselsak pawh hi a awlsam khawp mai. Chutiang thu leh hla chu social media-ah hian a tam thin hle. Khua leh tui tha, ram hmangaihtu dik te chuan kan phak tawka ram tana kan tih ve theih te kan ngaihven reng tur a ni, tiin a chah.
Pu Lalromawia Apeto, President, BSA leh Pu Biakthuama Molshoy, President, Bru Welfare Union of India te pawhin thu an sawi a, hun rei tak an lo dil a, an lo beisei tawh thin, Bru House cum Bru Hostel Mizoram sawrkarin a sa dawn ta chu an lawm tak zet thu an sawi a ni.
Pu Garojoy, GS, BSA chuan kal khawmte lawmna thu sawiin, BSA Shillong Cultural Troupe leh BSA Aizawl Branch te, Bodo Students Union, MZU ten hnam lam an entir a, Pu MS Vanlalhluta, Treasurer, chuan lawmthu sawiin inkhawm a khar a ni.
Boisu Kut hi Bru kum thar kut a ni a, kumin hi Bru Student Association te bul tuma an lawm tum lina a ni. Aizawlah hian lehkha zir mek leh hnathawka awm hi mi sang khat chuang an awm mek niin an sawi.
