157/2024-2025

Siaha the 12th April 2025: Tukin zing dar 7:00 khan Siaha khawchhunga African Swine fever (ASF) avanga vawk thi te phumna hmun chu Siaha bialtu MLA Dr K Beichhua hmalakna leh kaihruainain LAD Department leh AH & Vety atanga official-te bakah Joint VC leh Meisatla Village Council hruaitute nen a hmunah kalin an zuk enfiah. Siaha District khaw hrang hrangah ASF damlohna avangin vawk tamtak a thi tawh a, Siaha khawpui chhungah he thu ziah lai hian ASF vanga vawk thi leh suat (culled) hi hriat theih chinah 912 lai a tling tawh a, nitin an la thih belh zel tura ngaih a ni.

AH & Vety Deptt, LAD officials leh Joint VC leh Meisatlah khawtlang hruaitute hmaah thu sawiin Dr K Beichhua, MLA chuan “Sawrkar term hmasa lam atang tawh khan vawk pulhri (ASF) hian Mizoram pum nasa takin a nuai tawh a. Vawk tamtak a thi a, vawk vulhtu chhungkua tamtak eizawnna in nasa takin a tuar a ni. Mizoram Sawrkarin Sawrkar laipuiah nasa taka a nawrna zarah ASF lenna Mizoram District 10 a vawk vulhtute hnenah compensation pek an ni a, amaherawhchu vawk suat loh a thi te erawh chu State in a Disaster a a puan theih loh avangin compensation pek theih an nih loh thu a sawi. MLA Dr K.Beichhua chuan sawizawmin “Tuna Siaha Districta thil thleng hi  Sawkarin Disaster ah a puang tawh a, chuti a nih chuan compensation pawh  Disaster Management & Rehabilitation atanga pek theih dinhmun ah kan ding tawh a, a lawmawm hle mai. Chutih laiin suat leh suat loh a thi te compensation an pek thawm erawh hriat a la ni lo hi vawk vulhtute an lainatawm hle a,  tun kan Sawrkar pawh hian a la pe ngei tur ah beisei ila chutiang tur chuan I lo thlir ang u” a ti bawk.

Siaha bialtu MLA chuan a sawizelna ah “Hun hmasa lam ah khan District sawm (10) laiin ASF hri leng kan lo tuar tawh a Siaha District erawh vanneihthlak takin kan fihlim a. Tun tum ah erawh Siaha District ah Vawk ah kan intodelh hle a kan hriat laiin he ASF hi vanduaithlak takin a lo leng  a, tun thleng hian Vawk 912 lai (suatte nen) an thi tawh a an la thi dawn chauh niin a a lang. Department lamin theihtawpin hma an la chungin control theih dinhmunah a ding ta lova tuna kan buaipui ber zawk chu vawk tamtak thi mek te phum chungchang zawk hi a ni ber tawh a ni. AH & Vety Deptt leh MADC LAD tangkawpin Joint VCs te nen veng hrang hrangah hmalak a ni a, thawhhona pawh a tha hle” a ti.

Chutilai chuan vawk suat leh thi phumna tur laih ringawt pawh hi JCB leh mihring tha tamtak a ngaih bakah, bleaching powder leh chinai (lime) phul te leh nilenga duty tur rawihna manah te sum senna tur thahnem tak a awm avangin State Vety Department pawhin tuna an hmalakna ai a chak zawka hma rawn la a, sum leh pai te pawh rawn inphal deuh se a duh thu a sawi bawk a ni.

MLA Dr Beichhua chuan “Tun hun thleng hian State sawrkar atangin Siaha DVO hnen lah Rs 50,000/- pek tawh a ni. A lawmawm em em rualin hei ringawt hi chuan ASF hrik darh mek (outbreak) buaipui hi a har viau dawn a; chuvangin, kan tawrhna te min ngawihbo pui mai lova chak tak a hma lo la turin Mizoram Sawrkar ka phut tlat a ni” a ti bawk.

Siaha bialtu MLA Dr K Beichhua hi Pi S. Lalmuanpuii, Sr LAO, MADC, Dr Lalzarliana, DVO AH & Vety Siaha, Dr Beizakaw Vyhtu DVO, AH & Vety (MADC) leh Pu NT Sanga, Chairman, Joint VCs Siaha, VCP leh members Meisatla leh official  engemawzahin an tawiawm a ni.