828/2026-2027

Aizawl the 4th June 2026: Vawiin khan Meghalaya State Convention Centre, Shillong-ah NEC Plenary vawi 73-na Union Home Minister Pu Amit Shah, Chairman, NEC ni bawk hovin neih a ni a. Chief Minister Pu Lalduhoma chuan Ministry of DoNER hnuaia Convener a nihna High Level Task Force on Northeast Economic Corridor (NEEC) Final Report bu chu Pu Amit Shah hnenah hian a thehlut a, thusawina hun a hmang bawk.

Chief Minister chuan, Prime Minister-in India hmarchhak bialte tana a hmathlir Act East hi a tha hle a, nakin lawka India ram hmasawnna thlentu bulpui ni thei khawpin hmarchhak bial hi a awmna a remchang a, natural resource-ah te, mipuiah te, culture lamte thlengin theihna a nei a ni, a ti.

Chief Minister thusawi langsar dangte chu:

1. Connectivity hi kan zaa mamawh thlir a “One-Grid Approach” hmanga kalpui a tha a. Kawngpui, Railway, Air link, Waterway, Power, Telecom leh logistics te hi inkungkaih takin hmasawntir theih a tha.

2. Kaladan Multi-Modal Transit Transport Project hi a puitling hnai a, kawng hrang hranga kan inbuatsaih a ngai a. DoNER Ministry hian investment-readiness, trade-readiness, skill development, entrepreneurship promotion, border infrastructure leh logistics hub, community confidence-building programme-ah te hma min lakpui (support) se a tha hle.

3. Investment hi project hrang hrang kalpui thluah lovin, kan zaa mamawh thlirin a hlawm emaw a inzawmin (cluster) kalpui ila thain kan hria. Investment kalpui nana tha; Mau, Agri-Horti Value Chain, Food Processing, Textile, Eco-tourism, Green energy leh digital service-ah chutiang chuan kal ila kan zain kan chhawr tlang hle ang.

4. Tourism hi North East pumpui circuit pakhat anga common branding leh facilitation neia hmasawntir a tha berin a rinawm.

5. Trade leh logistics hi an pawimawh dan a inang reng a. Act East Policy leh India–Myanmar–Thailand Trilateral Highway hmangin North East chu logistics leh trade gateway atan siam theih a ni.

6. North East tana ruahman 10% Gross Budgetary Support (GBS) hi a hming maia kalpui lovin, tha takin kalpui thei ila. DoNER emaw NEC hnuaiah Coordination Mechanism siam ni se.

7. Kan thalaite hi kan resource pawimawh ber an ni a. Chuvangin, skill development, incubation, tourism & hospitality, logistics, agri-business, green technology leh start-up ecosystem lamah nasa zawka chher an ngai.

8. DoNER hnuaia project approval a lo chak zawk nan state tinah Project Implementation Unit din ni thei se, tih te an ni.

Pu Lalduhoma hian Mizoram chu “Ginger Capital of India” a puan a nih avang leh Mizoram Ginger USP Project a vangin lawmthu a sawi a. Thenzawl Peace City ruahman mek chu tourism, education, health, sports leh agro-based development hmunpui ni chho thei tur a nih avanga tihhlawhtlin ngei a tul thu a tarlang.

HLTF on NEEC Report a thehluh chungchang sawiin, he ruahmanna anga hmalak a nih chuan, India hmarchhak state-te inkalpawhna te, tourism te, investment te, trade and logistic te hi tum thuhmun nei takin a kal dawn a, kan hlawkpui vek dawn a ni, a ti.

73rd Plenary hi Pu Amit Shah hian a kaihruai a, DoNER Minister Pu Jyotiraditya Scindia, Minister of State for DoNER Dr. Sukanta Majumdar te leh hmarchhak state Chief Minister te leh official pawimawh tak takte an tel a ni.