Chief Minister Pu Zoramthanga chuan vawiin khan a bial Aizawl East-I chu tlawh in, Falkland, Zemabawk leh Zemabawk North a kawng siam ngai te leh zirna in thenkhat a tlawh.

Chief Minister chuan inkalpawhna kawng tha neih chu a ngaihpawimawh thu sawiin, heng veng pathum chhung a kawng siam that ngai te leh zauh ngai te bakah kawng sial belh theih tur lai te a hmunah a enfiah a. Chief Minister hian Falkland Upper Primary School te leh chhungkaw thawhchhuah tlem (lower income group) chenna tur in sak, Rajiv Awas Yojna hnuaia hmalakna te chu a enfiah a. Govt. Zemabawk Hr. Sec. School leh Govt. Zemabawk P/S IV leh Zemabawk North High School te a tlawh bawk.

Chief Minister hi School Education Department, UD&PA, PWD, P&E leh department danga hotute leh vengchhunga tlawmngai pawl leh khawtlang hruaituten an tawiawm a ni.