Tukin zing dar 7 : 30 a.m. khan Chief Minister Pu Lal Thanhawla chuan All India Radio, Aizawl Morning News Bulletin Mizo tawnga chhiar chu A.I.R. Station,Tuikhuahtlang-ah a hawng.

 

 

Chief Minister chuan Mizoramin State kan nihna ni champha-ah A.I.R. zingkar news bulletin hawn theih a ni chu a inhmeh hle a ni a tiin, Mizoram mipuite chu chibai a buk a. Vawiin ni anga state a hlankai ve tho, Goa leh Arunachal Pradesh te ang lo takin Mizoram chuan thisen tam tak chhuah hnuah state kan hmu ve a ni a, a hlu bik hle a ni a ti. All India Radio a Mizo programme hi July 1966 a bultan anih atang khan nasa takin Mizote hi kan inhnamhnawih chho zel a. Mizote inpumkhat na a ti tha mai nilovin, Mizoram pawn lama Zohnahthlak tam takin ngaithlain, kan hnam tawnga Lusei tawng kan hmangte hi kan tangkaipuiin Mizoram min ngaih tir nasa em em a ni a ti. Zokhua lamah ngaithlatu an tam avang ringawt pawh hian tih phuisui deuh deuh hi kan tih tur a ni a ti. Pu Hawla chuan Zohnahthlak zinga tawng hrang hrang kan hmante hi hun pek theih theuh ni thei se tih a duhthu a sawilang bawk.

A.I.R. hotu ten thenawm state ten khawl chak tak tak an hman ang te hman ve theih nise an tih chu, Chief Minister chuan mi state in an nei thei anih chuan kan nei thei ve tur a ni a ti a. Hmalakna turah kan theih ang ang chu tih kan inhuam a ni a ti.

A.I.R. Aizawl hian KW 20 an hman laiin, thenawm state te chuan KW 300 an hman thu an hotu ten an sawi a ni.

Hawnna inkhawm hi Station Director Pu L.Ch. Sailo in a kaihruai a. CM hi Pu P.C.Zoramsangliana, Minister, Transport etc in a tawiawm a ni.