3862/2022-2023

Aizawl, 16.03.2023: Chief Minister Pu Zoramthanga chuan vawiin khan Mizoram State Health Care Society in a buatsaih, ni hnih awh tur Ayushman Sangam - North Eastern Regional Review Meeting chu khuallian niin a hmanpui. He meeting, Aijal Club-a neih hi National Health Authority (NHA) bultum a ni a. NHA hi Ministry of Health and Family Welfare in health care scheme flagship programme a siam Ayushman Bharat Pradhan Mantri Jan Arogya Yojana (AB PM-JAY) kalpui tura ruat a ni. Hmarchhak state tin atangin an aiawhte an kalkhawm a ni.

Chief Minister Pu Zoramthanga chuan hriselna chu mihring nun a thil hlu berte zing ami, ram hmasawnna atan pawh a thil pawimawh tak a nih thu sawiin, mi khawsak harsa ber pawhin inenkawlna an mamawh ang an hmuh theihna tura health care scheme changtlung tak neih a pawimawh thu a sawi a. Vawiina meeting buatsaih chuan hmarchhak state-a sawrkar laipui health care scheme AB PM-JAY kalpui a nih dan chungchangah hmasawnna a thlen ngei a beisei thu a sawi bawk. Chief Minister chuan sawrkar laipuiin he health care scheme a kalpui hma kum engemawzat ral ta ah Mizorama hman tur state health care scheme ruahman a lo nih chhoh dan sawiin, sum tam tak dah theih a nih loh avang leh chhan dang dang avangin a nih tur anga kalpui a nih theih loh dan te, kum 2018 kum tawp atang khan thar thawh lehin, tunah chuan sawrkar laipui scheme nen kal kawpin, tichangtlung zelin huam zau zawka buatsaih zel tum a nih thu a sawi a. AB PM-JAY leh an state health care scheme chu changtlung leh huamzau zawka kalpui zel a nih nan theihtawp chhuah zel a nih tur thu a sawi.

Meeting hawnna inkhawm ah hian H&FW Dept. Principal Secretary Pi Esther Lalruatkimi chuan kalkhawmte lawmna thu sawiin, NHA CEO Pu S. Gopalakrishnan chuan he scheme hi a tam thei ang bera miin an hman tangkai a, a mamawh tuten enkawlna tha an hmuh mai bakah mahni inenkawl tha te an hriat theih nan thahnemngai taka state tin the hma la zel turin a chah a ni. NHA Addl. CEO Dr. Basant Garg chuan PM-JAY chungchang presentation a pe a, CEO Mizoram Dr. Biakthansangi chuan lawmthu sawiin hun a khar a ni.

NHA Addl. CEO in presentation a pekah a lan dan in hmarchhak state pariat zingah Assam chuan AB PMJAY beneficiary 30,03,069 neiin a tam ber a, Sikkim chu beneficiary 44,228 neiin a tlem ber a ni. Tun dinhmunah Mizoramah beneficiary 2,16,584 an awm a ni. Assam, Meghalaya leh Nagaland chuan PM-JAY hi state health care scheme nen thlungzawmin a kalpui a. Sikkim leh Tripura chuan state health care scheme hran an kalpui lo a ni.

Meeting hawnna inkhawm hi AB PM-JAY sum hman dan chungchangah leh state tin AB PMJAY hmalakna leh dinhmun sawina in a chhunzawm a. Naktuk March ni 17, 2023 hian meeting hi chhunzawm a ni ang a. Thu pawimawh tak tak sawihona leh inhrilhhriatna bakah field visit a hun hman a ni ang.