3861/2022-2023

Mamit 16th March, 2023 : Vawiin khan Mamit District Executive Force (DEF) te'n SP Conference Hall-ah an dincham kum 25-na (Silver Jubilee) an lawm a. Pu Devesh Chandra Srivastva, IPS, DGP(M) chuan khuallian niin he hun hi a hmanpui.

Khuallian DGP chuan Mamit DEF te'n Silver Jubilee an hmang thei chu lawmawm a tih thu sawiin SP leh a thawhpuite hmalakna fakawm a tih thu a sawi a. Hlim tlang taka Jubilee hmang theuh turin duhsakna a hlan nghal bawk.

Mamit District chu International Border leh Inter State Border nei a nih angin Police te chu an pawimawh zual thu a sawi a. Remna leh muanna a awm theih nan an hna-ah theihtawpchhuah turin a chah. Mamit District-in hma a sawn theih nan remna leh muanna kengkawh chunga hmala thin turin DC leh SP te chu a chah bawk. Kan rama hmeichhe tam takin Police an zawm chu lawmawm a tih thu sawiin Police Station-a Women Helpline chuan nunaute laka rikrumna thleng thin a tih tlem ngei a beisei thu sawiin Police chu dan leh thupek kengkawhtu an nih angin mipuite'n misual hremna kawngah dan chu anmahni duhdana kengkawng mai lo turin a chah bawk.

DGP chuan Drug addict te chu Criminal anga en lovin Victim anga theihtawpa tanpui turin kalkhawmte a chah a. Drug zuartute erawh chu an theihna zawng zawng bakah khawtlang hruaitute nen tangkawpa jail a dah an nih ngei theih nana hmala tura chahin mipuite himna atana thawk leh hlawh pek an nih ang ngeia Police zahawmna vawnghimtu ni tur leh an hna chanpual theuhte rinawm taka thawk turin Mamit DEF Staff te chu a chah bawk a ni.

He hunah hian Pu Lalfakzuala, Addl.DC, Mamit chuan Mamit DEF te'n Silver Jubilee an thleng ta chu a lawmpui thu leh Police te fuihna thu a sawi bawk.

Pi Lalthangpuii Pulamte, SP Mamit chuan kalkhawmte lawmna thu sawiin Pu Zoramthara, Addl. SP, Mamit chuan Mamit DEF chungchang leh an dinhmun, an chettlat dan hrang hrangte a lem nena entirin Presentation a nei bawk a ni.

Mamit SP Office hi 11th March, 1998 ah din tan niin 27th April, 1998 -ah function tan a ni a. Pu L.T. Hrangchal, IPS (Rtd) chu SP hmasa ber a ni. Mamit SP Office hnuaiah hian tun din hmunah Police Sub-Division pathum (3) awm mekin Police Station panga (5), Outpost pakhat (1) leh Border Outpost (BOP) sawm (10) a awm mek a ni.

Mamit DEF Silver Jubilee lawmna hun hi Session hnihah then niin chawhma lam hun hi Pu Zoramthara, Addl. SP, Mamit chuan a kaihruai a. Silver Jubilee lungphun hawnna leh Jubilee dar vuakna hun hman a ni. Chawhnu lam hun hi Inspector. C. Hualthankhuma'n Host-in Sports lawmman semna leh zai leh lama intihhlimna hun atan hman a ni a. Jubilee ruai kilho nghal a ni bawk.

He hunah hian Mamit DEF Staff te bakah sawmbikte an tel a ni.