Vawiin chawhma khan Aijal Club-ah khan National Urban Development Summit chu e-lets, Noida leh UD&PA, Mizoram tangkawpin buatsaih a. State 11 aiawh official te leh corporate hotute intawhkhawmna hun hi Chief Minister Pu Lal Thanhawla chuan khuallian niin a hmanpui a. He Summit pawimawh takah hian khawpui thang zelin a mamawh thil hrang hrangte leh engtia hmalak tur nge tih te bakah thawhhona kawng dap tlan dan te sawiho a ni.

National Urban Development Summit palaite hmaah thu sawiin Chief Minister Pu Lal Thanhawla chuan Mizoram chu hunrei tak chhung rambuai avanga nasa taka harsatna in a tlakbuak avangin midang ten an kalsan nasa hman hle a. Mahse sawrkarin midangte ruala ke pen ve turin theih tawp a chhuah zela  tunah chuan Mizoram chu dinhmun pangai takah a awm tawh tih a sawi a. Sawrkarin hmasawnna rualkhai zawk a duangin Flagship programme NLUP leh market economy tum ram thlenna tur Flagship programme tho, NEDP hmangin chak takin hma a la chhunzawm a ni a ti. NITI Aayog in India ram state thang tha ber 4 zingah Mizoram a chhiar tel bakah Ministry of Finance chhutlawk dan ang phei chuan sawrkar kumthar chhung hian state hmasawnna teh na GSDP punna chu digit-khat ni tawh lo in digit-hnih beisei a ni tawh zawk tih a sawi a. Mizoram in kawngtin renga hmasawn turin theihna a nei a; chu chu pawnlam sumdawnglian te pawn an rawn hriat theihnan Mizoram sawrkar pawhin hma a lak mek a.  Sumdawngliante kohchhuah nan Magnetic Mizoram  Roadshow tih pawh Mumbai, New Delhi leh Kolkata-ah hlawhtling takin neih a ni tawh a ni a ti.

Chief Minister Pu Lal Thanhawla chuan Aizawl khawpui cheng mipuite chu Mizoram chhunga khawdang te aia a tam bik em em na chhan chu Rambuai laia sipai nghaisakna tlanchhiatsan ten inhumhimna leh eitur an hmuh beisei avanga khatih laia khawpui awmchhun a nih anga hmanhmawh taka an pan chum chum vang a ni tih a sawi a. Nasa taka pemlut an awm avangin khawpui nihphung pangai angin ruahmanna feltak hmelhmang pu thei pawh a ni ta lo a ni a ti. "Tunah, NLUP leh NEDP hmangin thingtlangmiten an chenna khawbuzawla an intodelh a, an chenna nuam an tih leh theihna tur leh Aizawl khawpuia awmze neiloa pem an rilruk loh na tura kan hmalaknate a hlawhtling chho mek zel a ni", a ti.

National Urban Development Summit-a khualzahawm UD&PA Minister Pu Zodintluanga chuan Summit palaite chu lo lawm in inkawmhona leh sawihona hlawhtling tak an neih a beisei thu a sawi a. Summit a inkawmhona leh hma an lo laktawh dan te inhrilhhriattawnna atangin khawpui thang zelin harsatna a tawh sutkiandan tur te bakah -  a mamawhte thildangte pawh ngaihtuahchhuah theih ni se a lawmawm hle ang a ti. Mizoram Sawrkar in Central Flagship programme te chak takin a kalpui thu te, Mizoram Flagship Programme NEDP kaltlanga khawpui chhunga hmasawnna ruhrel dinna kawnga  hmalak mek a nih thu te a tarlang a. Aizawl Smart City Project, Project lian dang te leh Urban Development huang chhunga hmalaknaah te hmasawnna bakah hlawhtlinna duhawm tak takte  hmuh chhoh mek zel a ni tih a sawi a. Prime Minister Narendra Modi-an New India 2022 a tihhlawhtlin a beiseite puitlin turin Mizoram chu an inringtawk tih leh he mi zulzui hian kum 2022 a lo thlen meuh chuan  Mizoram Thar -2022(New Mizoram - 2022) pawh hmasawnna kawnga thlentir chu  sawrkar leh Mizoram mipuite thiltum a ni a ti.

National Urban Development Summit, Aizawl, Mizoram hi "Exploring Best Practices for India's  Urban Landscape" tih thupui hmanga hawn a ni a. He hunah hian Chief Secretary Pu Arvind Ray, UD & PA Secretary Dr C. Vanramsanga, Sikkim Namchi Municipal Council Chairman Pu Udai Chandra Rai, DoNER Economic advisor Pi Mamta Shankar leh E-lets Technomedia CEO Dr.Ravi Gupta ten thusawina hun an hmang a ni.He hunah hian  eGovernance Magazine thlangzarhna hun hman a ni a. e-Lets  in hna thawktha a thlanchhuahte hnena lawmman semna hun pawh hman nghal a ni a - Editor's Choice Award  chu Rajasthan Sawrkar in lawmman pahnih -  eGovernance for Smart and Digital Jaipur leh Promoting Smart Education for Government College Students of Rajasthan avangin a dawng a; Sikkim Sawrkar in Upgradation and Augmentation of Crematorium for Buddhist avangin a dawng a; Nagaland Sawrkar in Innovations in Solid Waste Management avangin a dawng a; Haryana sawrkarin lawmman pahnih - Innovations in Smart e-Toilets  bakah 1. Cashless Haryana Consolidation Portal (CHC Portal) 2. Haryana - Realtime Automated Feedback Dashboard (H-RAFD) avangin a dawng a; Uttar Pradesh Sawrkar chuan Implementing the Revenue Court Computerised Management System (RCCMS) avangin a dawng a; Madhya Pradesh Sawrkar in  Transforming mobility in Religious Smart City avangin a dawng a; Jammu & Kashmir sawrkar chuan Innovations in Survey & Land Records  avangin a dawng a; Ministry of DoNER in Innovations in DoNER: Inclusive Growth of Northeast a dawng thung a ni.

Hawnna hun bakah National Urban Development Summit, Aizawl, Mizoram ah hian zirhona hun 5 dang buatsaih a ni a. Heng hun te hi thupui 5 - International Collaboration & Experience for Inclusive Urban Growth, Smart City : Challenges and Opportunities, Challenges in Urban Development & Municipal Administration, Leveraging Technology for Sustainable Urban Development leh Digital Revolution and Innovation in Urban Transportations hmanga then hran a ni.