Vawiin khan a rualin Aizawl-ah leh Lopu khua-ah cheng nuai Rs.25/- senga siam 7.5KVA Lungpuk Solar Power Plant hawn a ni.

He Lungpuk Solar Power Plant hi Director General Assam Rifles Civic Action Programme atanga siam a ni. Aizawl-ah hian Assam Rifles te hmunpui HQ 23 Sector-ah Lt Gen Shokin Chauhan, AVSM, YSM, SM, VSM, Director General Assam Rifles in ral atangin a hawng a. He mi rual hian Lopu khuaah an VCP Pu Rakhu leh Assam Rifles Major Kakkar ten an lo hawng ve bawk a ni.

Aizawla Assam Rifles te hmunpui HQ 23 Sector-a Lt.Gen.Shokin Chauhana'n Solar Power Plant a hawn lai hian Pi Harleen Kaur IAS, Siaha DC, Major General Upendra Dwivedi, Inspector General Assam Rifles (East) leh Brig M S Mokha, Sena Medal, DIG 23 Sector,Assam Rifles ten an tawiawm a ni.

He 7.5KVA Solar Power Plant hi hawn zawh a ni hnuah Lt.Gen.Shokin Chauhan chuan Siaha DC leh Lopu VCP kutah a hlan nghal a ni.

He 7.5KVA Lungpuk Solar Power Plant hmang hian Lopu khuaa chhungkaw 255 bakah Community Hall , Schools 3 leh Biak In-ah te Eng chhit a ni ve dawn ta a ni.