4326/2024-2025

Dated Aizawl, the 18th February 2025: Vawiin khan Chief Minister Pu Lalduhoma chuan Hangi Lunglen Tlang, Aizawla Aizawl Peak Resort Skywalk chu a hawng. Aizawl Peak Resort hi Er. H. Ginzalal, Adviser to CM (technical) te chhungkaw enkawl a ni.

Thusawiin Chief Minister chuan, Er. H. Ginzalala te chhungkaw thawhrimna leh inpekna a fak a, India rama Solar Pumping sang ber a lo siam tawh a, tunah Mizorama Skywalk hmasa ber an siam leh ta a ni. Rawngbawltu chhungkua atanga seilian, Pathian malsawm tlaka nung an ni tih pawh a chiang a ni, a ti a. A  hmalaknaah lawmthu a hrilh.

Pu Lalbiakzama, Speaker, Pu K. Sapdanga, UD & PA Minister leh Pi Lalrinpuii, Tourism Minister te pawhin thusawina hun an hmang ve bawk. 

Skywalk hawnna hunserh hi Pi Dimngaihvungi, Er. H. Ginzalala nu chuan a hmang a. Er. H. Ginzalala chuan technical report a pe. 

Skywalk Structure hi Nail India Adventure Private Limited, Pune te siam a ni a, Glass Panel hi Toughened Glass 30mm a chhah, meter 10 a sei, meter 2.24 a zau a ni. Meter khat bial hian puitling 7 a dawl zo va, a glass chinah hian mi 135 a ruala awm thei tura duan a ni. An enchhinnaah chuan sand bag kg 9500 vel zet an dah a, a him tawk hle. A him leh him loh hi NIT Mizoram ten an endik a, kg 100 veka rit mi 150 pawh a rualin kal se, a dawl zo hle dawn niin an ngai. A enkawltute chuan a rualin mi 20 aia tam lo vel zel an kaltir thung dawn niin an sawi.

Skywalk hi zanin dar 8 atangin mipui tan an hawng nghal dawn a, a kal man hi mi pakhat tan Rs. 100 a ni.