3108/2023-2024

Dated Aizawl, the 19th December, 2023: Vawiin khan Chief Minister Pu Lalduhoma chuan a pisaah All Mizoram Centrally Sponsor Scheme Coordination Committee hruaitute nena inkawmna a buatsaih a, CSS hnuaia hnathawk mekte harsatna chipchiar takin a ngaihthlak sak.

Chief Minister chuan, kan hriat theuh angin financial year tawp lamah sawrkarna kan han vuan a ni a. Tun hnai lawk khan Central lamin nitina kan sum kawl theih zat a rawn titlem bawk a. Chuvang chuan chak taka kal theih a ni rih lo tih hi mipuiten min hriatpui kan duh hle a ni. Tin, kan lo sawi tawh thin angin kan state sum dinhmun titha chho turin nakkum hi inpuahchah kum (year of consolidation) atan kalpui kan tum bawk a. Inren takin kan awm ang a, Resource Mobilization Committee in chak takin hma a la ang a, eirukna (corruption) awm lovin kan kal bawk ang a, kum khat hnuah chuan kan ziaawm chho hle turah kan inngai a ni, tiin hmanhmawh taka hnathawh nghal a harsat rih thu a hrilhfiah a. An mamawh thlente chu tunhma atanga a lo hriatpui leh a veipui tak te an nih thu a hrilh a ni.

Chief Minister tawiawmtu Pu K. Lalthawmmawia, IAS, Commissioner & Secretary to Chief Minister chuan Mizoram CSS Employee te dinhmun chawikanna atana zirbingtu pawl (study group) sawrkarin ama kaihhruaina hnuaia a lo din tawh thu leh an zirchianna pawh kum 2021 a an thehluh tawh thute a tarlang a, an report chanchin tlangpui sawifiahna a nei bawk.

Heng an zirchianna te a taka hmang tura chinfel ngai te a fel thuai theih nan naktuk meeting dawta Cabinet Meeting awm leh hmasa bera a lo chhawpchhuah tur thu Chief Minister hian All Mizoram CSS Coordination Committee hruaitute hi a hrilh a ni.

Hei bakah hian Central Sponsor Scheme hna te chak taka thawh a nih theih nan state sawrkar chuan central atanga fund lokal te Single Nodal Agency hnenah rang taka hlan zung zung a tum tlat dawn tih lo hrilhin, kan thawh chaka Utilization Certificate kan pek thlak hma hian fund dang a lo thleng leh ranga, hmasawn chak turin chutianga kal theih chu a tul kan ti hle a ni, tiin thawktute hamthatna mai ni lo an hnathawhna fund te pawh chak zawka an hnen thlentir zel an tum thu a lo hrilh bawk.

All Mizoram CSS Coordination Committee te hi an Chairman Pu Malsawmtluanga Hauhnar hovin CM hi an hmu a ni.