3109/2023-2024

Aizawl, 19th December, 2023 : Vawiin khan Home Commissioner Pu H. Lalengmawia chuan Mizoram chhunga district hrang hrang bawrhsapte Video Conferencing neih puiin kumin hunpui lo thleng tur (Krismas leh Kumthar) atana an inbuatsaihna leh raltlante dinhmun an sawiho.

Bawrhsapte hian Krismas leh kumthar vuakveta boruak a muan theihna tura an hmalakna chi hrang hrang an tarlan bakah November ni 21, 2023 a Chief Secretary Dr Renu Sharma hova committee sang thurel an bawhzui dan te an tarlang a, an district theuh a Superintendent of Police te leh tlawmngai pawlte nen thawhhona tha tak an neih thu te tarlangin, ruihhlo leh a kaihhnawih laka thalaite an him theihna tura hma an lakna te an tarlang a ni.

Raltlan dinhmun pawh tarlan niin nimin tlai thlenga report an dawn dan chu hetiang hi a ni - Kolasib district ah Manipur atanga raltlan mi 2971 an awm mek a, an zinga 586 hi relief camp hrang hrang 9 ah awmin midang zawng hi chhungte leh thian tha te bel an ni. Saitual district ah Manipur atanga raltlan mi 1327 awmin an zinga 127 hi relief camp hrang hrang 8 ah an awm a ni. Hnahthial district ah Manipur atanga raltlan an awm lova, Myanmar atanga raltlan mi 1101 an awm thung a ni.

Serchhip district ah Manipur atanga raltlan mi 105 awmin, Myanmar atanga raltlan 343 an awm a, relief/refugee camp awm tawh lovin chhungte leh thian that e bel an ni. Aizawl district ah Manipur atanga raltlan 796 awmin relief camp 13 a awm a ni. Lunglei district ah Manipur atanga raltlan mi 62 leh Myanmar atanga raltlan 2000 an awm a ni. Mamit district ah Manipur atanga raltlan mi 164 leh Myanmar atanga raltlan 365 an awm a ni. Siaha district ah Manipur atanga raltlan mi 59 leh Myanmar atanga raltlan 5900 an awm a ni. Lawngtlai district ah Myanmar atanga raltlan mi 305 an awm a, Khawzawl district ah Manipur atanga raltlan mi 107 leh Myanmar atanga raltlan mi 109 an awm a ni.

Champhai district ah Manipur atanga raltlan mi 407 awmin chhungte leh thian tha te bel an ni a. Myanmar atanga raltlan mi 12484 awmin an zinga mi 6014 hi refugee camp a awm an ni.

Home Commissioner Pu H. Lalengmawia chuan district bawrhsap te chu Mizoram State Legislative Assembly election tluang leh felfai taka an kaihhruai avanga lawmpuina thu sawiin Krismas leh kum thar vuakvetah pawh mipuiten hun ralmuang tak hnuaia hlim leh lawm taka an hman theihnan nasa taka tan la turin a chah a, hemi atana an ruahmanna siam te pawh a felfai tha hle a a hriat thu sawiin mipuite tawiawmna a pawimawh avangin khawtlang leh tlawmngai pawl hruaitute nen thawhhona tha tak nei turin a chah a, noise pollution-free leh air pollution-free hunpui chhunga kan nih ngei theih na an hmalakna turah duhsakna a hlan a ni.

Pu H. Lalengmawia chuan ruihhlo leh dan lova thil lakluh kawngah sawrkar thar a khauh hle tih sawiin a bik takin Myanmar atanga kuhva ro lo lut a ngai thu tak a, a che vel reng reng hi man vek tur tih a nih thu leh PHQ lam pawh hriattir an nih thu a sawi a, Champhai, Kolasib leh Mamit bawrhsap te chu hemi chungchangah mawhphurhna an nei lian hle tih a sawi bawk a ni.