3308/2023-2024

Dated Aizawl, the 10th January, 2024: Vawiin khan Chief Minister Pu Lalduhoma chuan a pisaah Aizawl Mayor Pu Lalrinenga Sailo leh a thawhpui Corporators te a kawm a. Corporators te hian lawmpuina hlanin an mamawh thil hrang hrang te an sawipui nghal.

Chief Minister chuan, tun hnaia Aizawl bawlhhlawh paituten an bawlhhlawh paihna man an hmuh loh rei avanga din an ngaih mai theih thu chanchinthar atang a lo hria thu hrilhin, a hriat ruala Finance department hotute biaa, AMC bawlhhlawh paihna sum pek chhuah tur awm ang te pe chhuak tura a hrilh nghal thu a lo hrilh a. Aizawl Bypass road chhuah lam leh tlak lamah a awm thar thuai dawn a, chu chuan nasa takin Aizawl khawpui hi a zauh dawn a ni. Chhuah lama bypass road thawhna tur phei chu Union Minister of Road Transport & Highways in min sanction tawh a ni, tiin Aizawl zauh zel nana hmalakna awm dang te nen a lo hrilh bawk. Tin, Chief Minister hian, bawlhhlawh paihna neih belh kan mamawh hle tawh a, tuna SASCI atanga Hualngohmuna Solid Waste Management Centre thawh mek te, Smart City Fund atanga Luangmual Industrial Growth Centre a thawh mekte hi uluk takin kan vil dawn a, a hunah, a nihna tur ang taka an zawh ngei kan phut dawn a ni. Sihphira thawh tur pawh chutiang bawkin kan umzui ang, tiin Aizawl Solid Waste Management Centre siam belh mek te an ngaihven thu a lo hrilh bawk a ni.

Mayor leh a thawhpuite hian Aizawl khawpui zauh zel tura hma lak a tulna te, sawrkara an dinhmun (status) hniam lutuk te, an lawmman beitham lutuk te leh state danga anmahni ang corporator an phak loh dan te an thlen a. Central lama Urban Local Body Fund tam tak haichhuah tur awm chu tun aia nasa zawka haichhuah dan a awm theih thute pawh an sawi a ni.

Chief Minister hian an dinhmun siam that an mamawhna, India ram hmun danga corporator te nena an dinhmun khaikhinna te leh lehkha pawimawh dang te ziaka a hnena thlen turin a lo ngen a ni.