Ni 4 chhung (20 - 23 November, 2012) awh tur Hriselna Kut AYUSH puala buatsaih, Mizorama a tum 3-na Arogya Mela 2012 chu vawiin khan Chief Minister Pu Lal Thanhawla’n Lunglei Saikuti Hall-ah a hawng.
Hawnna thu a sawiah Chief Minister chuan hriselna kut atang hian hnam hrisel leh hnam zahawm, hnam hmasawn chak nih tum tura inzir chho zel turin mi zawng zawng chu a sawm a. Hnam ropui leh hnam dingchhuak tur chuan kan taimak a, kan thawhrim a ngai a, chumi tur chuan kan hrisel a ngai a ni, a ti a. Mizote hi ei leh inah kan fimkhur tawk thin lova, zir tur kan la ngah hle a, zuk leh hmuam lamah phei chuan fimkhur mai a tawk lova, kan sima kan fihlim angai a ni a ti.
Chief Minister chuan central sorkar-in thingtlang mite tan kum 2005 atang khan programme ngaihpawimawh bik Bharat Nirman a rawn dinchhuah thu sawiin, hemi-ah hian National Rural Health Missiom (NRHM) chu a pakhat a ni, a ti a. He programme hi mipui tam zawkin an hriat theih nan hriselna lama intawhkhawmna
Arogya Mela hi buatsaih thin a ni a ti a. Mipui ten hetiang hi keimahni tan a ni tih hriain kan ngaihven a, kan hlutsak a tul a ni a ti bawk. NRHM hi dik taka hmang ni ila nasa takin hma kan sawn tawh ang tiin, an sorkar atang hian awmze neia kalpui chho in tunah hian hma kan sawn hle tawh a ni a ti. Arogya Mela-ah hian natna chi hrang hrang cancer, HIV, malaria, TB, zunthlum leh a dang tam tak enkawl dan leh enkawl dan dang alternative therapies an tih AYUSH lam te pawh inzirtirna neih thin a nih thu a sawi a. Doctor rawn chungchangah Mizote chu a tlangpuia mi zakzum, kan natna chipchiar taka doctor-te hrilh hreh a, zep nei thin kan nihna hi bansan a hun a ni Chief Minister chuan a ti a. Kimchang taka doctorte kan hrilh hian a enkawlna a ti awlsam zawk hle thin a ni a ti.
Chief Minister hian Mela a free clinic te, exhibition, yoga demonstration an neihte a fangkual bawk a ni.
Khualzahawm Pu Lalrinliana Sailo, Health Minister chuan Allopathy leh Ayush chu kalkawp tir (streamline) anih thu a sawi a. Punjab sorkarin Ayush doctor tuna an neih sa 520 bakah 200 dang an lak leh tur thu sawiin, mipuiin an hmang tangkai em em a ni a ti.
Mizoramah Ayush hmanga damlo enkawlna district zawng zawng hospital-ah khum 10 theuh a awm a. Tunah hian contract-in doctor 24 an awm mek a ni.
Hawnna inkhawm Chairperson Pi Esther Lalruatkimi, Secretary, Health etc chuan yoga hi sakhuana nen inzawmna a neih loh thu sawiin, rilru insawizawina anih thu a sawi bawk.
Mela hawnna inkhawmah hian Pu S. Hiato, Industries Minister, Pu H. Zothangliana leh Pu S. Laldingliana Parliamentary Secretaries te, Pu R.L.Pianmawia, Dy Chief Whip leh Pu Joseph Lalhimpuia, Vice Chairman, HPC Lunglei te an tel bawk a ni.
