Vawiin chawhma dar 11:00 khan International Year of Co-operative 2012 leh All India Co-operative Week vawi-59 na kharna hun chu I&PR Conference Hall, Lunglei ah Lunglei District Co-operative Union chuan a hmang a ni. He hun hi Pu Joseph Lalhimpuia, Vice Chairman, HPC Lunglei chuan a hmanpui a ni.

Vice chairman, HPC chuan Mizo te tan chuan Co-operative society chu thil thar a nih ngai loh thu a sawi a,Mizo te hi hmanlai pipu te hun atangin lungrual taka tang ho thin kan ni, a ti. Tunhnai mai ah Co-operative Society te a hlawhchham lek lek fo mai hi kan in bih chian a ngai a. Mimal anga kan thahnem ngaihna,kan rinawmna leh taimakna te hi pawl thenkhatah chuan a lang chhuak thin a. Kohhran leh YMA ah te sum felfai taka vawn a nih theih lai in pawl tam tak chu mimal rinawm loh vangin hma an sawn thei lo a ni, a ti. Mizo ze mawi te kha Co-operative society ah hian paw lut ila ram hmasawn nana thawh hlawk tak society a lo awm thei dawn a ni, a ti.

59th All India Co-operative Week closing programme Pu Zosangliana Murray ARCS, Lunglei kaihhruai ah hian “Co-operative Enterprises Build a Better World” tih chu thupui ah hman ani a. Pu C.Lalramzauva, Chief Manager, MCAB, Lunglei chuan “Society leh Bank inlaichinna” tih hmangin thu a sawi a, “PACS tobul leh kalphung” tih chu Pu K.Rothangpuia, BOD, LDCU in a sawifiah bawk an ni.