Chief Minister Pu Lal Thanhawla chuan sawrkarin kuthnathawktute hmakhua a ngaihven thu te, vawiina NEDP hnuaia textile training hawn tur chu sawrkarin mipuite a duhsakna a lantirna a nih thu leh, a chhimtute eizawnna kawnga puitu a nih ngei a beisei thu a sawi. Handloom sawi chuan Thenzawl hi Mizoramah chuan a lansarh ber a ni tiin Handloom industry a thawkte thawhrim vang a nih avangin Commerce & Industries Department leh Mizo Heritage thahnemngaihna avanga training buatsaih tur chu an chhawr tangkai ngei a rin thu a sawi a. Training in a tum ber pakhat chu handloom atanga eizawngtuten ten an thil siamchhuah man man zawkin leh tam zawka an hralh theih nan an thiamna tipung a, tih dan phung changkang leh tha zawk hmanga khawvel market-ah handloom phochhuah a nih thu a sawi a. State pawna zawrh dawn chuan hlawm tam zawk leh hnam dangin an hman tangkai theih tur variety hrang hrang - thuamhnaw bakah bag leh In cheina tarmawi te siam tel tha a tih thu a sawi a. Hlawm tam zawk siamchhuah avangin quality chhiat phahlo se, uluk leh kutchhuak tha zawka siam ni zel se tiin kalkhawmte chu a chah a. Chief Minister chuan Handloom lama thiamna nei sa chauh nilovin thiam ve lo thiamna duh vete pawh a huam avangin lawmawm tiin, training hlawkthlak tak an hman a duhsak thu a sawi.

Minister Pi Vanlalawmpuii Chawngthu pawhin thu sawiin, handloom lama tui mite tan hmasawn zelna tura training nei duh, sum harsatna avanga theilo te tan a thlawn a mithiamte zirtirna hnuaia hun remchang sawrkar kaltlanga buatsaih a ni chu lawmawm a tih thu a sawi a. Handloom kutchhuakte chu Mizo hnam ziarang leh kutthemthiamna khawvel hmuha phochhuahna remchang leh tha tak a nih thu sawiin, mipui pawhin kan hlut nachang kan hriat zel a tha a ni, a ti a. Hnam changkang zawkte kan tih aiin Mizo hnam puan design, a rawng inthlak dan te a nalh zawk thu a sawi a. Cooperation Minister chuan Handloom chu eizawnna ngelnghet leh tha a ni tih hre reng chunga taima taka hman tangkai ngei tum chunga kal turin kalkhawmte a chah a ni.

Training Project hnuaia hian mi 150 hnenah mithiam bik sawmte -  Pu Jagdish Sarmah, Designer (MFA-NIFT) Empanelled Designer DC (H&H) leh Pi Lalringzuali (National Merit Certificate Holder,2011) DC(H&H) te leh mithiam dangte puihbawmna in inzirtirna pek a ni ang a. Trainee te hi batch 5 ah then leh niin, batch thin hian ni 15 chhung zel training an nei ang. Training laia tithate hnenah lawmman sem ruahman a ni a, trainee-te hi PMSBY (Pradhan Mantri Suraksha Bima Yojana) hnuaiah cheng nuai 2 thlengin Life Insurance tih sak annih bakah DA an bill thei dawn bawk a ni.

Vawiin training hawnna inkhawm hi Commerce & Industries Director Pu J. Hmingthanmawia chuan a kaihruaiin, Pu K. Zodinmawia, Mizo Heritage Chairman chuan report pek leh lawmthu sawina a hmang a ni. Thenzawl a sawrkar office hotute leh khawtlang hruaitute leh tlawmngai pawl hruaitute an tel a ni.