Vawiin khan Pu Zodintluanga hovin New Secretariat Conference Hall ah National Cadet Corps (NCC) State Level Advisory Committee an thukhawm.
Meeting-ah hian Lunglei a NCC Batallion thar din chungchang rel niin Ministry of Defence atangin sanction hmuh tawh a nih thu te, Lungleia awm tur Junior Commissioned Offcer pali leh Non-Commissioned Offcer pariat te chuan 1 Mizo Bn., Aizawlah attach-a an awm tawh thu ngaihthlak a ni a. Mizoram sawrkar chuan NCC Batallion thar awmna tur building bakah civil staff mi 26 leh inenkawlna tur sum thenkhat a tum dawn a.Ministry of Defence chuan Army Officer pahnih, JCO pariat leh NCO sawmpariat he hmunah hian dah a remti a ni. Lunglei NCC Batallion hian Saiha, Lawngtlai leh Serchhip a enkawl tel ang.
Tuirial Airfield-a NCC Academy din tur pawh chak taka bawhzui mek a ni a. Cadastral Survey neih niin tun dinhmunah a rang lama NCC Academy hi luah a nih theih nan Airfield-a a zawl chin, tarmac leh a chhehvel chu NCC te hnenah luah phalna pek phawt ni se, tiin an rel a. Heng baka ram mamawh dangte chu danin a phalsak ang zela pek leh tur an ni.
State Level Advisory Committee thukhawm hmasain thutlukna a lo siam tawh bawhzuiin NCC tan hian Mizoram sawrkar chuan thlawhna khalh dan zirna flight simulator pawh a lei tawh a. Flight simulator thar hi July thla tawp lamah emaw August thla tirah Mizoram lo thleng hman tura beisei a ni. He flight simulator hi NCC Cadet-te tan chauh nilo, pilot-a tan chak Mizo thalaite tan pawha hman tangkai theih tura ruahman a ni.
Meeting-ah hian MLA Lt.Col.Z.S.Zuala bakah Sports and Youth Services Secretary, Revenue Secretary, School Education Department, Finance Department, Higher and Technical Education Department aiawhte, School Principal te, NCC hotute leh mi pawimawh dangte an tel a ni.
