Vawiin chawhma khan Venghlui Central Hall-ah Mizoram Government Muster Roll Employees Association(MGMREA) chuan Group 'C' leh 'D' sawrkar hna nghet lak tura Muster Roll Regularisation Scheme kaltlanga  an luh theihna 35% a sawrkarin a tihpunsak chu  an lawm a. He hun hi  Health Minister Pu Lal Thanzara chuan khuallian niin a hmanpui a ni.

Health Minister Pu Lal Thanzara chuan MR hnathawkte  chu dinhmun tha zawka hlan kai an nih avanga a lawmpui thu a sawi a. Sawrkar chuan a hnathawkte zingah a hnahniam thawk te leh a hna sang zawk thawk te pawimawh dan chu inangkhat rengah a ngai a, tumah thliar hranna a nei lo a. Thahnem ngai tur ten,  tan la zual tur te leh eirukna chi hrang hrang, a lian atanga  a te ber laka  inthiar fihlim theuh turin sawrkar hnalian thawk  te, hnahniam zawk thawk te leh a nghet loa sawrkar chhawr mek te chen in beisei an ni a ti.  A nghet loa chhawr, MR te pawh sawrkar hnathawk nghet te ang thoa harsatna tawk thei , damlo thei leh chawlh mamawh an ni tih sawrkarin a hriatpui a, Casual Leave leh Maternity leave chungchangah pawh sawrkarin ngaihtuahna a seng mek a ni a ti. Health Minister Pu Lal Thanzara chuan, " Sawrkar hna ringawt hna a ngaihna tihbo a hun tawh a, ram changkang zawkte angin lehkha zirsang te hlei hlei hian eizawnna hna tlinga ngaih i ngah thar ang u.  Mizoramah hna thawh tlak tam tak thawhsen loh, chhungte leh mahni inchawmna atan pawh a hlawk,  state pawna mi ten an hmu nasa lutuk hi kan in enchian a hun a. Hetih laia Lehkhathiam hna hmu lo pawl ang chi a ding te hi thil pawm har tak leh rilru ti na em em tu a ni a, insiam tha tura kan puanven kan sawi chhin a hun tawh hle a ni",a ti.

Sawrkarin a ngaih pawimawh ber chu thlabi hlawh nei ve lo, ram mipui tam zawkte hamthatna tur leh kut hnathawktute tana hmasawnna programme hrang hrang a duan te tih hlawhtlin a ni a ti a. He sawrkar thiltum  tihhlawhtlin chu sawrkar  hnathawk zawng zawng , a sang ber atanga a te ber thleng leh MR a thawkte chena mawhphurhna a ni thung a ni a ti.

Thusawitu dang, Pu T.Sangkunga, MLA chuan pawl, a huho leh ram anga hmasawnna phenah hruaitute thawhrimna leh inpekna bakah a nawrtu mipui te leh pawl member te taihmakna  a awm tih a sawiin hruaitute leh mipuite  mawhphurhna chu a pawimawh ve ve a ni a ti. Sawrkar hnaah a lian leh a te an awm a ngai a, department lian tak tak te, engineering department leh damdawiin lam hnaah te thleng pawh a hniam ber te pawimawhna hmuh hmaih theih a ni lo a. Chuvangin sawrkar pawhin a nghetloa a chhawrte thawhrimna leh pawimawhna chenin a hria a ni a ti a.  Sawrkar hna thenkhat lak turah MR te chanvo 35% dah sak a ni chu lawmawm a tih thu sawiin hamthatna siamsaktu  sawrkar thatna chu taihmakna a an rulh let ve ngei pawh thil tihawm tak a ni a ti.

Sawrkar hnuaia MR a thawkte hi  tunhnaia Trade Union pawl atanga an inlak hran hnu in MGMREA Membership Enrollment ah an inziak fel vek lo na in tunah hian MGMREA member 3500 bawr vel an awm anga chhut a ni a. Mizoram sawrkar hnuaia MR hnathawkte, DP &AR in March 22, 2017 a tarlan dan chuan Engagement Card nei  3568 leh Engagement card neilo - PWD, PHE leh P &E hnuaia thawk MR 5669 an awm a ni.