Vawiin khan CMO Conference Hall Kolasib ah District Bawrhsap leh Chairman, Anti-Tobacco Squad Kolasib District ni bawk Dr.Arun T, IAS hoin World No Tobacco Day hman a ni.

He hunah hian Khuallian chuan Mizoram chu India ram State zawng zawnga vaihlo hmang nasa ber State pahnihna (58.7% current Tobacco users) kan nih thu tarlangin hei hian mipui hriselna a khawih chhiat nasat zia chu Mizoram mipuite hi a hrechiang bertu kan ni tiin vaihlo do na kawnga tan kan lak a ngai nasa hle  ani a ti a. Vaihlo leh a kaihhnawih tamtak zingah meizial leh tuibur chu a hlauhawm leh zual thu sawiin Cancer tam ber thlentu pawh heng te hi an ni a, vaihlo chu do satliah nilovin rawngbawlna (Mission Mode) ah ngaiin tih takzeta kan do a hun tawh ani ati a. Hemi hma hruaitu a tan hian COTPA,2003 Section-4 in a khap angin Puipunna hmun a bikin Sawrkar pisa leh Damdawiin ah te hmalak hmasak a tul thu sawiin District Anti Tobacco Squad chu tan la leh zualin heng hmunah te hian ngun leh zuala kal kualin heng phalloh na hmuna meizu thin te chu hneh taka vai thin tur in a  chah a ni.

"Mihring hian mei zuk leh zukloh chungchangah duhthlanna kan nei teh meuh mai, amaherawh chu kan meizial zuk avanga midang harsatna tawrh tir emaw harsatna siamsak (second hand smoke) hi mahni mihring pui te laka pawi sawina lian tak ani" tiin a bik takin Damdawi in leh a hmunhma huam chhunga (Hospital Compound) meizuk phei chu dan bawhchhiatna lian tak Criminal Offence a tling hial a ni a ti.  Sawrkar Pisa a hnathawk te leh Damdawi ina thawk ten Sawrkar thupek chu zawm hmasa phawt ila mipuite tan entawn tur kan hnutchhiah anga hei hian inthunun na kawngah nasa leh zualin min pui dawn ani ati. Dr.Arun T chuan vaihlo thatloh zia leh a nghawng nat zia te chu nasa leh zuala Print leh Visual Media a tidarh thin turin Media mi te chu thawhpui ah a sawm bawk a ni.

He huna vaihlo ina mihring a nghawng dan te zirtirna pe tu Dr. H.Lalnunhlua, Medical Officer tarlan danin Kum 2016-17 chhunga Mizoram mipuite midang meizial khu hip thin (Exposure to second hand smoke) chu za zel ah 84.1 a ni a, hei hian meizial zu chauh nilo a zu velo te pawh a nghawng nasat zia chu a tilang chiang hle a ni a ti. Dr. Lalnunhlua tarlan zel na ah chuan kum 2016-17 chhungin Mizoram ah vaihlo leh a kaihhnawih khawih 58.7% atangin meizu 34.4% niin vaihlo khulo chi (Smokless Tobacco) hmangtu chu 33.5% an ni .

Dr.C.Vanlalhlimpuia, District Nodal Officer, National Tobacco Control Programme, Kolasib ina a tarlan danin Kolasib ah kum 2016 atanga kumin thleng hian Anti-Tobacco Squad Drive vawi 61 neih tawh niin mi 81 te chu COTPA Sec-4 hnuaiah hrem tawh an ni. Hemi bakah hian May ni 21, 2018 a Legal Metrology Department te nena  Anti-Tobacco Squad Drive an neihna ah Khawchhak Cigarette bawm 3207 leh cheroot tlawn 1850 an man thu a tarlang bawk ani.

 He hunah hian Kolasib khawchhunga khawtlang hruaitute leh chanchinbu mite an kalkhawm a ni.