Khawvel puma ‘World No Tobacco Day 2018’ vawiina hman anih rualin Mizoram hmun hrang hrangah pawh hman a ni a. Mizoram Lok Sabha MP Pu C.L.Ruala hoin Aizawl Civil Hospital Conference Hallah pawh ‘Vaihlo leh Lung Natna’ tih thupui hmanga hun hman a ni.

He hun Dr.A.Muthamma, IAS, Aizawl DC kaihhruaiah Pu C.L.Ruala chuan vaihlo leh a kaihhnawih hian kan taksa bung hrang hrang a tichhe nasa thei hle a, thil pawi tak a ni tiin, a tur a nain sim a har a, chuvangin inhmamhnawih loh a tul hle a ni a ti. India ram state te zinga zuk leh hmuam ti nasa ber dawttu kan ni mek a, he dinhmun atanga kan tlakhniam theihnan sorkar leh mimal tinte kan tan sauh sauh angai a ni a ti.

He hun hmannaah hian vaihloin kan hriselna a tihchhiat theihzia chi hrang hrang National Tobacco Control Programme a mithiamten entirnate an nei a, vaihlo laka fihlim school chawimawina te nei bawkin, dan zawmlo man khawm cigarettes bawm 38,858 Cheng 11,65,740/- hu halral a ni bawk a ni.

Chawhnu sessionah HIMNA-MADAT hnuaia school thlanbikte atanga Headmaster te leh Nodal Teachers te tan programme buatsaih a ni bawk.