Chief Minister Pu Lal Thanhawla chuan vawiin khan Assam Regiment Centre, Shillonga Parson’s Parade Ground-ah Assam Regiment sipai rawngrut (recruits) tling thar 300 batch passing out parade, attestation of new recruits passing out parade a hmanpui. He hun hmang tura sawmtu, Assam Regiment Centre Commandant Brig. Ved Prakash chuan rawngrut tling thar 402 zinga a tam zawk, 282 te hi Mizo tlangval an nih avang leh training na-a a ti tha berte an nih avanga hmanpui tura Chief Minister hi sawm a ni a, Chief Minister pawhin tel ve ngeina chi ah a ngai a ni.

Chief Minister chuan sipai tling tharte hmaa thuchah a sawiah, Assam Regiment Centre in recruits thar, batch 300-na  hapta 42 chhung ngawrh tak leh rim taka training hlawhtling tak a hlenpui chu a lawmawm takzet a ni tiin, chibai bukin duhsakna a hlan a. India hmarchhak state atanga hnam hrang hrang sipai tharte zingah hian a tam ber chu Mizoram mi an ni chu a vanneih thlak hle a ni a ti. Training chhuak tharte bakah an chhungte hnenah India sipai huaisen ni tura an inpeknaah Chief Minister chuan lawmthu a sawi bawk a. ‘Tunah chuan sipai tha ni turin training khauh tak in paltlang tawh a, ramin in huaisenna te, nunna hlan ngam khawpa in inpekna te leh in theihna zawng zawng hmang turin a beisei dawn che u a ni’ a ti.

Chief Minister chuan Assam Regiment Centre, ni 1 December 1941-a din hi India sipai training-na hmun tha berte zinga a tel pha chu a lawmpui thu a sawi a. Ram venhim hna bakah chhiatrupna thlen thulha tanpuina hna thawhte, helna tukdaih kawngah te leh civil administration tanpuina-a an inpek thin na chu a fakawm tak meuh a ni a ti a. Heng mai piah lamah ram chhung leh khawvel huapah infiammi chhuanawm tak tak, football ah te, gymnastics ah te, karate te, hockey leh silai kahah te a chherchhuak hi a ropui hle a ni a ti.

Chief Minister hian he hun hmang tur hian nimin, ni 9.3.2012 khan Shillong panin Aizawl a chhuahsan a. Shillonga lo hmuaktu Federation of Mizo Welfare Organisation (FMWO) hmaa a thusawiah, Mizo tawng hi dik taka hman leh humhalh a tulzia uar takin a sawi a. Mizote hi rambuai hma kha chuan sipaiah kan thawh hlawk hle a, tunhnu hian kan kiam nasa ta hle a, officer phei chu tih tham kan awm mang tawh lo a ni a ti a.Chuvangin hemi lama kan hnufumna phuhruk tur hian Sainik School Chhingchhip-ah din turin hmalak mek a ni a, a hna pawh tan thuai beisei a ni a ti. Pu Hawla chuan Mizoramah social reformation a ngai a ni tiin, sum ngainatna lama kan intlansiak ta lutukte hi Pathian theihnghilh nan kan hmang palh ang tih a hlauhawm a ni a ti a. Sum chu rim taka hna thawka thawhchhuah chi a ni tiin, zawn hmuh leh nghah chhuah chi a ni lo a ni a ti. Mirethei leh mi chanhaite chawikan nan leh ei leh bara kan intodelh theihna turin sorkarin nasa takin NLUP hmangin tan a la a ni a ti a. Mizorama nghet taka zung kaih tawh,eirukna corruption pawh kum 3 chhungin harsa tak chungin a zung kan phawi tawhin kan hria a, phoro tur chuan hma kan lak zui zel a ngai a ni a ti.

 FMWO hnenah hian tangkai taka an hman atan Chief Minister hian Ambulance a pe a ni.

 Passing out parade-a sipai thar te hi Sipaia tang tura Chief Minister-in Zemabawk Helipad-a a vailiam tak te kha an ni a. Hei hi Chief Minister in Mizo thalaite sipai a tang tur a  a fuihna rah chhuah pawimawh tak pakhat a ni

Chief Minister hi a nupui Pi Lal Riliani bakah Lt. Col.Z.S.Zuala, MLA ten an tawiawm a ni.